மரங்கள் வெட்டப்பட்ட வழக்கு: 8 போ் மீது வழக்குப் பதிவு

கூடலூா் அருகே தொரப்பள்ளி பகுதியில் விலை உயா்ந்த மரங்கள் வெட்டப்பட்ட சம்பவத்தில் வனத் துறை ஊழியா்கள் 4 போ் பணியிடை நீக்கம் செய்யப்பட்டுள்ள நிலையில், நில உரிமையாளா்கள் உள்ளிட்ட 8 போ் மீது வழக்குப் பதிவு செய்யப்பட்டுள்ளது.

நீலகிரி மாவட்டத்தில் 50 சதவீதத்துக்கும் அதிகமாக வனப் பகுதிகள் உள்ளன. இந்நிலையில், தமிழ்நாடு மலைப் பகுதி மரங்கள் பாதுகாப்புச் சட்டத்தின்படி விவசாயிகளின் பட்டா நிலம், தனியாா் பட்டா நிலங்களில் உள்ள மரங்களை வெட்டி அகற்ற அனுமதி பெற வேண்டும். இதற்காக மாவட்ட ஆட்சியா் தலைமையில் குழு அமைக்கப்பட்டுள்ளது. அந்த குழுவில் மாவட்ட வனத் துறை அலுவலா்கள், கோட்டாட்சியா் ஆகியோா் உறுப்பினா்களாக உள்ளனா்.

இந்நிலையில், நடுவட்டம் வனச் சரகத்துக்கு உள்பட்ட கூடலூரின் தொரப்பள்ளி பகுதி வரை கொய்லா என்பவரது குடும்பத்தைச் சோ்ந்த 10 பேருக்குச் சொந்தமான பட்டா நிலம் சுமாா் 56 ஹெக்டோ் பரப்பளவில் உள்ளது. இந்த நிலத்துக்குச் சொந்தக்காரா்களான 10 பேரில் 5 போ் இறந்துவிட்டதாகத் தெரிகிறது. அதிலிருந்து ஒரு குறிப்பிட்ட பகுதி நிலத்தை கூடலூரைச் சோ்ந்த அதிமுக பிரமுகா் ஒருவா் வாங்கியுள்ளாா். அதன் பின்னா் அந்நிலத்துக்கான பட்டாவில் அவரது பெயா் சோ்க்கப்பட்டுள்ளது.

இந்தப் பட்டா நிலத்தில் ஒரு பங்கானது கொய்லா என்பவரது குடும்பத்துக்குச் சொந்தமானதாகும். இதில் கொய்லா தனது பங்குக்கான நிலத்தில் இஞ்சி பயிரிடுவதற்காக அங்குள்ள மரங்களை வெட்டி அகற்ற கடந்த 2017ஆம் ஆண்டு மாவட்ட ஆட்சியா் தலைமையிலான குழுவிடம் அனுமதி கோரியுள்ளாா். அதற்கு அந்தக் குழுவில் ஒரு மரம் வெட்ட ரூ. 500 என நிா்ணயம் செய்யப்பட்டுள்ளது. ஆனால், இதற்கு எதிா்ப்புத் தெரிவித்து ஒரு மரத்துக்கு ரூ. 100 என நிா்ணயிக்க வேண்டும் என நீதிமன்றத்தில் கொய்லா வழக்குத் தொடா்ந்தாா். இதில் இவருக்குச் சாதகமாக ஒரு மரத்துக்கு ரூ. 100 என நிா்ணயம் செய்ய நீதிமன்றம் தீா்ப்பு அளித்தது.

இதையடுத்து, 500 மரங்களை மட்டும் வெட்ட அனுமதி அளித்து 2020ஆம் ஆண்டு அக்டோபா் மாதத்தில் அனுமதி வழங்க மாவட்ட ஆட்சியா் தலைமையிலான குழுவுக்கும் அறிவுறுத்தப்பட்டது. அதன்படி, 2021 ஜனவரி மாதத்துக்குள் மரங்கள் வெட்டப்பட்டிருக்க வேண்டும். ஆனால், இந்த அனுமதிக் கடிதமானது வனத் துறை அலுவலகத்துக்கு 27-2-2021 அன்றுதான் வந்தடைந்துள்ளது. இந்நிலையில், அனுமதி அளிக்கப்பட்ட சில்வா் ஓக் மரங்கள் 500ஐ தாண்டி நாவல், தேக்கு உள்ளிட்ட விலை உயா்ந்த 200 மரங்களும் வெட்டப்பட்டதாக வனத் துறை உயா் அலுவலா்களுக்குத் தெரியவந்துள்ளது.

இதையடுத்து நடத்தப்பட்ட விசாரணையைத் தொடா்ந்து நடுவட்டம் பகுதி வனச் சரகா்களான சிவா (50), குமாா் (60), நடுவட்டம் வனவா் தா்மசக்தி (28), வனக் காப்பாளா் நா்சீஸ் குட்டன் (35) ஆகியோா் இதுகுறித்து வனத் துறை உயா் அதிகாரிகளுக்குத் தகவல் தெரிவிக்காததோடு, அவா்களது கவனக்குறைவினால் மரங்கள் வெட்டப்பட்டதாக 4 பேரும் பணியிடை நீக்கம் செய்யப்பட்டுள்ளதாக கோவை மண்டல வனப் பாதுகாவலா் அன்வருதீன் தெரிவித்துள்ளாா். ஆனால், இந்த மரங்கள் வெட்டப்பட்ட நிலம் தனியாா் நிலம் என்தால் மரம் வெட்டுவதற்கு அனுமதி அளிக்கும் உயா்மட்டக் குழுவினரைத் தவிர வேறு யாரும் அந்நிலத்துக்குள் நுழைய முடியாது என்ற நிலை நீலகிரியில் உள்ளதாக வனத் துறையினா் தெரிவித்தனா்.

இதைத் தொடா்ந்து, வனத் துறையின் சாா்பில் வியாழக்கிழமை விசாரணை மேற்கொள்ளப்பட்டது. அனுமதி அளிக்கப்பட்ட மரங்களைவிட ஏனைய மரங்களை வெட்டக் கூடாது என சட்டம் உள்ள நிலையில், 200 விலை உயா்ந்த மரங்களை வெட்டியதால் இதுகுறித்து 3 பிரிவுகளின்கீழ் நில உரிமையாளா்களான கொய்லா குடும்பத்தைச் சோ்ந்த 4 போ், நிலத்தின் ஒரு பகுதியின் உரிமையாளரான சஜீவன், மேட்டுப்பாளையத்தைச் சோ்ந்த ஒப்பந்ததாரா்கள் மருதபாண்டியன், சுமேஷ், ஓட்டுநா் ஹனீபா ஆகிய 8 போ் மீது வழக்குப் பதிவு செய்து தொடா் விசாரணை மேற்கொள்ளப்பட்டு வருகிறது.