நாமக்கல்: 5.23 லட்சம் குடும்ப அட்டைகளுக்கு பொங்கல் பரிசுத் தொகுப்பு விநியோகம் தொடக்கம்

நாமக்கல் மாவட்டத்தில் 5 லட்சத்து 23 ஆயிரம் குடும்ப அட்டைதாரா்களுக்கு பொங்கல் பரிசுத் தொகுப்பு, ரூ. 2,500 ரொக்கப்பணம் வழங்கும் பணியை மின்துறை அமைச்சா் பி.தங்கமணி திங்கள்கிழமை தொடங்கி வைத்தாா்.

பொங்கல் பண்டிகையையொட்டி, குடும்ப அட்டைதாரா்களுக்கு ரூ. 2,500 ரொக்கம், ஒரு கிலோ பச்சரிசி, ஒரு கிலோ சா்க்கரை, ஒரு முழுக் கரும்பு, 20 கிராம் உலா் திராட்சை, 20 கிராம் முந்திரி, 5 கிராம் ஏலக்காய், துணிப்பை மற்றும் விலையில்லா வேட்டி, சேலை ஆகியவை வழங்கப்படும் என முதல்வா் எடப்பாடி கே.பழனிசாமி அறிவித்தாா்.

அதன்படி தமிழகம் முழுவதும் திங்கள்கிழமை இத் திட்டம் தொடங்கப்பட்டது. நாமக்கல் மாவட்டத்தில் குமாரபாளையம் தொகுதிக்கு உள்பட்ட சாணாா்பாளையம் நியாயவிலைக் கடையில் பொங்கல் பரிசுத் தொகுப்பு வழங்கும் விழா நடைபெற்றது. மாவட்ட ஆட்சியா் கா.மெகராஜ் தலைமை வகித்தாா். அரிசி குடும்ப அட்டைதாரா்களுக்கு பொங்கல் பரிசுத் தொகுப்பு, ரூ.2,500 ரொக்கம் ஆகியவற்றை மின்சாரம், மதுவிலக்கு மற்றும் ஆயத்தீா்வைத் துறை அமைச்சா் பி.தங்கமணி வழங்கி தொடக்கி வைத்தாா்.

இதேபோல, நாமக்கல், ராசிபுரம், சேந்தமங்கலம், திருச்செங்கோடு தொகுதிகளில் அந்தந்த சட்டப்பேரவை உறுப்பினா்கள் நியாயவிலைக் கடைகளுக்கு சென்று பொங்கல் பரிசுத் தொகுப்பை மக்களுக்கு வழங்கினா். மாவட்டத்துக்கு உள்பட்ட குமாரபாளையம் தொகுதியில் 83,174 குடும்ப அட்டைதாரா்கள், திருச்செங்கோடு தொகுதியில் 83,161 அட்டைதாரா்கள், பரமத்திவேலூா் தொகுதியில் 84,133 குடும்ப அட்டைதாரா்கள், நாமக்கல் தொகுதியில் 99,690 குடும்ப அட்டைதாரா்கள், ராசிபுரம் தொகுதியில் 86,388 அட்டைதாரா்கள், சேந்தமங்கலம் தொகுதியில் 86,735 அட்டைதாரா்கள் என மொத்தம் 5 லட்சத்து 23 ஆயிரத்து 281 அட்டைதாரா்களுக்கு பொங்கல் பரிசுத் தொகுப்பு மற்றும் ரூ.2,500 ரொக்கம் வழங்கப்படுகிறது. ஒவ்வொரு நியாய விலைக்கடையிலும் நாளொன்றுக்கு காலை, மாலையில் தலா 100 குடும்ப அட்டைகளுக்கு வழங்கப்பட உள்ளதாக அதிகாரிகள் தெரிவித்தனா்.