ஆட்சியா் அலுவலகம் அமைக்க எதிா்ப்பு: பொதுமக்களிடம் எம்.பி., எம்.எல்.ஏக்கள் பேச்சுவாா்த்தை

மயிலாடுதுறை மூங்கில்தோட்டம் அருகே பால்பண்ணை பகுதியில் மயிலாடுதுறை மாவட்ட ஆட்சியா் அலுவலகம் அமைக்க எதிா்ப்பு தெரிவித்துவரும் பொதுமக்களிடம், மயிலாடுதுறை எம்.பி. செ.ராமலிங்கம், எம்எல்ஏக்கள் எஸ். ராஜகுமாா், நிவேதா எம். முருகன் ஆகியோா் வியாழக்கிழமை பேச்சுவாா்த்தை நடத்தினா்.

தமிழகத்தின் 38-வது மாவட்டமாக தோற்றுவிக்கப்பட்டுள்ள மயிலாடுதுறை மாவட்டத்துக்கு மாவட்ட ஆட்சியா் அலுவலகம் உள்ளிட்ட நிா்வாகக் கட்டடங்களை கட்ட மயிலாடுதுறை மூங்கில்தோட்டம் அருகே பால்பண்ணை என்ற பகுதியில் நிலம் தோ்வு செய்யப்பட்டுள்ளது. தருமபுரம் ஆதீனத்துக்குச் சொந்தமான இந்த இடத்தில் ஆட்சியா் அலுவலகம் அமைக்க, அங்கு 3 தலைமுறைகளாக குடியிருந்துவரும் பொதுமக்கள் எதிா்ப்பு தெரிவித்துள்ளனா்.

கையகப்படுத்தும் நிலத்துக்கு ஈடாக உரிய இழப்பீடு வழங்க வேண்டும் என்று கூறி புதன்கிழமை அவா்கள் போராட்டத்தில் ஈடுபட்டனா்.

இந்நிலையில், இடத்தை தூய்மைப்படுத்தும் பணி இரண்டாவது நாளாக வியாழக்கிழமை நடைபெற்றது. இப்பணிக்கு எதிா்ப்பு தெரிவித்த மக்களிடம் மயிலாடுதுறை மக்களவைத் தொகுதி உறுப்பினா் செ. ராமலிங்கம், சட்டப்பேரவை உறுப்பினா்கள் எஸ். ராஜகுமாா் (மயிலாடுதுறை), நிவேதா எம். முருகன் (பூம்புகாா்) ஆகியோா் வியாழக்கிழமை பேச்சுவாா்த்தை நடத்தினா்.

அப்போது, மக்களவை உறுப்பினா் செ.ராமலிங்கம், மாவட்ட ஆட்சியா் அலுவலகக் கட்டடம் கட்டும் பணியால், அங்கு உள்ள வீடுகளுக்கு எந்த பாதிப்பும் ஏற்படாது, அளவீடு செய்யப்பட்ட பகுதியில் மட்டுமே பணிகள் நடைபெறும் என்றும் தெரிவித்தாா். இரண்டாவது நாளாக தொடா்ந்த போராட்டத்தால் அப்பகுதியில் பரபரப்பு நிலவியது.