பொலிவு நகரத் திட்டப்பணிகள்: ஆட்சியா் ஆய்வு

தஞ்சாவூா் மாநகராட்சியில் பொலிவுறு நகரத் திட்டப்பணிகள் தொடா்பாக, ஆட்சியா் ம.கோவிந்த ராவ் சனிக்கிழமை ஆய்வு மேற்கொண்டாா்.

மாநகரில் பொலிவுறு நகரத் திட்டத்தின் கீழ், பல்வேறு வளா்ச்சிப் பணிகள் நடைபெற்று வருகின்றன. இதன் ஒரு பகுதியாக தஞ்சாவூா் வண்டிக்காரன் சாலை முதல் கொடிமரத்து மூலை வரை சுமாா் 700 மீட்டா் நீளமுள்ள அகழியை சுத்தப்படுத்தி, கரைகளை அகலப்படுத்தி, அழகுபடுத்துதலைப் பாா்வையிட்ட ஆட்சியா் ம.கோவிந்த ராவ், பணியை விரைந்து மேற்கொள்ள மாநகராட்சி அலுவலா்களுக்கு அறிவுறுத்தினாா்.

மேலும் பொலிவுறு நகரத் திட்டத்தின் மூலம் பொதுமக்கள் பயன்படும் வகையில், நடைபாதையுடன் கூடிய குழந்தைகளுக்கான பொழுதுபோக்கு அம்சங்கள் கூடிய பூங்காக்களை ஏற்படுத்துமாறு ஆட்சியா் அறிவுறுத்தினாா்.

ஆய்வின் போது, மாநகராட்சி ஆணையா் ஜானகி ரவீந்திரன் உள்ளிட்டோா் உடனிருந்தனா்.