நடிகர் விமல் புகார்: தயாரிப்பாளர் சிங்காரவேலன் கைது

பணமோசடி தொடர்பாக நடிகர் விமல் அளித்த புகாரின் அடிப்படையில் தயாரிப்பாளர் சிங்காரவேலன் கைது செய்யப்பட்டுள்ளார்.

மன்னர் வகையறா படத்துக்காக ரூ. 5 கோடி பணம் பெற்று மோசடி செய்துவிட்டதாக நடிகர் விமல் மீது தயாரிப்பாளர்கள் கோபி, சிங்காரவேலன் ஆகியோர் சென்னைக் காவல் ஆணையர் அலுவலகத்தில் புகார் அளித்தார்கள். இப்பிரச்னை தொடர்பாக விமல் மீது நான்கு புகார்கள் அளிக்கப்பட்டுள்ளன. காவல்துறைக்கு விளக்கமளித்த விமல், தன்னைத் தான் சிங்காரவேலன் ஏமாற்றி விட்டதாகப் புகாரும் அளித்திருந்தார்.

சிங்காரவேலன் தான் கோபிக்குப் பணம் கொடுக்கவேண்டும். எனக்கும் அதற்கும் சம்பந்தம் இல்லை. சிங்காரவேலன், கோபி ஆகிய இருவர் மீதும் விருகம்பாக்கம் காவல் நிலையத்தில் புகார் அளித்துள்ளேன். அவர்கள் மீது வழக்குப்பதிவு செய்யப்பட்டுள்ளது. சிங்காரவேலன் கொடுத்த தொல்லையால் கடந்த மூன்று ஆண்டுகளாக நான் மன உளைச்சலில் இருந்தேன் என்று செய்தியாளர்களிடம் தெரிவித்தார் விமல்.

இதற்கு முன்பு, தனது பெயரைப் பயன்படுத்தி, போலியான ஆவணங்களைத் தயாரித்து பண மோசடியில் ஈடுபட்டதாக தயாரிப்பாளர் சிங்காரவேலன் மீது நீதிமன்றத்தில் வழக்கு தொடர்ந்தார் நடிகர் விமல். நீதிமன்றத்தின் உத்தரவுப்படி சிங்காரவேலன் மற்றும் அவருடைய நண்பர்கள் மீது மீது 2021-ல் வழக்குப்பதிவு செய்யப்பட்டது. அந்த வழக்கில் முன்ஜாமீன் பெற்றிருந்தார் சிங்காரவேலன். எனினும் நீதிமன்ற உத்தரவுகளைச் சரியாகப் பின்பற்றாததால் தயாரிப்பாளர் சிங்காரவேலன் இன்று விருகம்பாக்கம் காவலர்களால் கைது செய்யப்பட்டுள்ளார்.

விருகம்பாக்கம் காவல் நிலையத்தில் சிங்காரவேலன் மீது விமல் மற்றொரு புகார் அளித்துள்ளார். இதையடுத்து சிங்காரவேலன் மற்றும் அவருடைய நண்பர்கள் மீது 5 பிரிவுகளில் விருகம்பாக்கம் காவல்நிலையத்தில் வழக்குப்பதிவு செய்யப்பட்டது. இந்த வழக்கிலும் சிங்காரவேலன் தற்போது கைது செய்யப்பட்டுள்ளார்.