நடிகர் அஜித் நடித்துள்ள வலிமை படத்தின் டிரெய்லர் சமீபத்தில் வெளியாகி படத்தின் மீதான எதிர்பார்ப்பை அதிகரித்துள்ளது. இந்தப் படத்தை போனி கபூர் தயாரிக்க வினோத் இயக்கியுள்ளார். பொங்கலை முன்னிட்டு இந்தப் படம் ஜனவரி 13 ஆம் தேதி திரைக்கு வரவிருக்கிறது. 

இந்தப் படத்தில் தெலுங்கு நடிகர் கார்த்திகேயா வில்லனாக நடிக்க, ஹுமா குரேஷி, சுமித்ரா, யோகி பாபு, புகழ் உள்ளிட்டோர் முக்கிய வேடங்களில் நடித்துள்ளனர். நீரவ் ஷா இந்தப் படத்துக்கு ஒளிப்பதிவு செய்துள்ளார். 

இந்தப் படத்திலிருந்து இரண்டு பாடல்கள் மற்றும் விசில் தீம் வெளியாகி நல்ல வரவேற்பைப் பெற்றது. இந்த நிலையில் யுவனுக்கு பதில் ஜிப்ரான் வலிமை படத்தின் பின்னணி இசையமைத்துள்ளதாக தகவல் வெளியாகியுள்ளது. இந்தத் தகவல் ரசிகர்களிடையே அதிர்ச்சியை ஏற்படுத்தியுள்ளது. 

இதையும் படிக்க | பிக்பாஸில் அமீர், தாமரையிடையே வலுக்கும் சண்டை - ''என்னை கேட்க உனக்கு உரிமையில்லை''

வினோத் இயக்கிய தீரன் அதிகாரம் ஒன்று படத்துக்கு ஜிப்ரான் தான் இசையமைப்பாளர் என்பது குறிப்பிடத்தக்கது. இதுவரை அஜித் படங்களில் யுவனின் பின்னணி இசை கால கடந்தும் நிற்கும் அளவுக்கு இருந்துள்ளது. இந்த நிலையில் வலிமை படத்தில் யுவன் பின்னணி இசை அமைக்காதது பெரும் பின்னடைவை ஏற்படுத்தக் கூடும்.