பெங்களுரு: கர்நாடக முன்னாள் அமைச்சர் கலி ஜனார்த்தன ரெட்டி தனது மகள் திருமணத்திற்கு அசத்தலான வீடியோ பத்திரிகை ஒன்றை தயார் செய்து அனைவரையும் பிரமிக்க வைத்துள்ளார்,

கர்நாடகாவில் முந்தைய எடியூரப்பா தலைமையிலான பாரதிய ஜனதா ஆட்சியின்போது சுரங்கத்துறை  அமைச்சராக இருந்தவர் கலி ஜனார்த்தன ரெட்டி (வயது 49). இவரது மகள் பிரம்ஹானி. இவருக்கு வருகிற நவம்பர் மாதம் திருமணம் நடைபெற உள்ளது.

தனியார் சுரங்க அதிபரான கலி ஜனார்த்தன ரெட்டி தனது மகளின் திருமணத்திற்கு பிரமாண்ட ஏற்பாடுகளை  செய்துள்ளார். அதன் ஒரு பகுதியாக திருமண பத்திரிகையானது இதுவரை யாரும் செய்யாத முயற்சியாக புதுமையான விதத்தில் வடிவமைக்கப்பட்டது.

ஒரு சின்ன பெட்டி வடிவத்தில் திருமண பத்திரிகை வடிவமைக்கப்பட்டுள்ளது. அதைத் திறந்தால் உள்ளே ஒரு சிறிய எல்.சி.டி. திரை அமைக்கப்பட்டுள்ளது. பத்திரிகையை திறந்த உடன் அந்த திரையில் ஒரு வீடியோ படம் ஓடுகிறது. அதில் ஜனார்த்தன் ரெட்டியின் குடும்பத்தினர் தோன்றுகின்றனர். அவர்கள் திருமணத்திற்கு வருமாறு அழைப்பு விடுக்கிறார்கள்.அந்த வீடியோவின் இடையே மணமகள்-மணமகனும் தோன்றுகிறார்கள்.

மிக அதிக பொருட்செலவில் இந்த வீடியோ தயாராகி இருக்கிறது. இந்த வீடியோ பத்திரிகை தற்பொழுது ஊடகங்களில் பரவலான கவனம் பெற்றுள்ளது. இந்த கலி ஜனார்த்தன ரெட்டி சுரங்க மோசடியில் சிக்கி 3 ஆண்டுகள் சிறையில் இருந்தவர் என்பது இங்கே குறிப்பிடத்தக்கது.