நாட்டில் மொத்தம் 142.38 கோடி தடுப்பூசிகள் செலுத்தப்பட்டுள்ளன: மத்திய அரசு

நாட்டில் இதுவரை மொத்தம் 142.38 கோடி தடுப்பூசிகள் செலுத்தப்பட்டுள்ளதாக மத்திய சுகாதாரத் துறை அமைச்சகம் தெரிவித்துள்ளது.

தடுப்பூசி எண்ணிக்கைகள் குறித்து அமைச்சகம் தெரிவித்துள்ளது:

"திங்கள்கிழமை மட்டும் இரவு 7 மணி வரை 65,20,037 தடுப்பூசிகள் செலுத்தப்பட்டுள்ளன. இரவு வரை செலுத்தப்படவுள்ள தடுப்பூசிகளின் முழுமையான தரவுகள் கிடைக்கும்போது இந்த எண்ணிக்கைகள் மேலும் அதிகரிக்கும். இதுவரை மொத்தம் 1,42,38,12,552 தடுப்பூசிகள் செலுத்தப்பட்டுள்ளன.

இதையும் படிக்க | பூஸ்டர் டோஸ், சிறார்களுக்கான தடுப்பூசி: வழிகாட்டு நெறிமுறைகள் வெளியீடு

இதில் முதல் தவணை தடுப்பூசி செலுத்தியவர்கள் 83,80,04,579. இரண்டாவது தவணை தடுப்பூசி செலுத்திக்கொண்டவர்கள் 58,58,07,973."

நாடு முழுவதும் கடந்த ஜனவரி 16-ம் தேதி தடுப்பூசி செலுத்தும் திட்டம் தொடங்கப்பட்டது. முதற்கட்டமாக சுகாதாரப் பணியாளர்களுக்குத் தடுப்பூசி போடப்பட்டது. முன்களப் பணியாளர்களுக்கு பிப்ரவரி 2-ம் தேதி தடுப்பூசி செலுத்தும் பணி தொடங்கப்பட்டது. அடுத்தகட்டமாக 60 வயதுக்கு மேற்பட்டவர்கள் மற்றும் இணை நோய் இருக்கும் 45 வயதுக்கு மேற்பட்டவர்களுக்கு மார்ச் 1 முதல் தடுப்பூசி போடும் பணி தொடங்கப்பட்டது.

45 வயதுக்கு மேற்பட்ட அனைவருக்கும் ஏப்ரல் 1-ம் தேதி முதலும், 18 வயதுக்கு மேற்பட்ட அனைவருக்கும் மே 1-ம் தேதி முதலும் தடுப்பூசி செலுத்தும் பணி தொடங்கப்பட்டது.

இதன் தொடர்ச்சியாக 15-18 வயதுடைய சிறார்கள் மற்றும் முன்களப் பணியாளர்கள், சுகாதாரப் பணியாளர்கள், இணை நோய் இருக்கும் 60 வயதுக்கு மேற்பட்டவர்கள் முன்னெச்சரிக்கை தவணை தடுப்பூசி செலுத்திக்கொள்வதற்கு முறையே ஜனவரி 3 மற்றும் 10 முதல் மத்திய அரசு அனுமதியளித்துள்ளது.