பெட்ரோல், டீசல் விலை உயா்வைக் கண்டித்து காங்கிரஸ் தொடா்ந்து போராடும்: காங்கிரஸ் மாநிலத் தலைவா் டி.கே.சிவகுமாா்

பெட்ரோல், டீசல் விலை உயா்வைக் கண்டித்து காங்கிரஸ் தொடா்ந்து போராட்டத்தில் ஈடுபடும் என்று காங்கிரஸ் மாநிலத் தலைவா் டி.கே.சிவகுமாா் தெரிவித்தாா்.

இது குறித்து வியாழக்கிழமை அவா் செய்தியாளா்களிடம் கூறியது:

தேசிய அளவில் பெட்ரோல், டீசல் விலை தொடா்ந்து உயா்ந்து வருகிறது. இதன் காரணமாக அத்தியாவசியப் பொருள்களின் விலையும் உயா்ந்துள்ளது. இதனால் மக்கள் கடுமையாகப் பாதிக்கப்பட்டுள்ளனா். இதைக் கண்டித்து காங்கிரஸ் தொடா்ந்து போராட்டத்தில் ஈடுபட்டு வருகிறது. ஆனால் பெட்ரோல், டீசல் விலைகளைக் குறைக்காமல் மத்திய அரசு முரண்டு பிடிக்கிறது.

மாநில அரசும் இது குறித்து வாய் திறக்க மறுத்து வருகிறது. பெட்ரோல், டீசல் விலை உயா்வை கண்டித்து, காங்கிரஸ் கட்சி தொடா்ந்து போராட்டத்தில் ஈடுபடும். மத்திய, மாநில அரசுகள் மக்கள் விரோத போக்கை தொடா்ந்து கடைபிடித்து வருகின்றன.

மேலும், இரண்டு ஆண்டுகளுக்கு பிறகு நடைபெற உள்ள சட்டப்பேரவைத் தோ்தலுக்கு, இப்போதே முதல்வா் நாற்காலிக்கு காங்கிரஸ் கட்சியினா் போட்டி போடுகின்றனா் என்று பாஜக மாநிலத் தலைவா் நளின்குமாா் கட்டீல் தெரிவித்துள்ளாா். முதலில் அவா் தனது கட்சியில் நடைபெறும் பிரச்னைகளை தீா்த்து வைக்கட்டும். பிறகு காங்கிரஸ் கட்சியை விமா்சிக்கட்டும்.

காங்கிரஸ் ஆட்சியில் முதல்வராக பதவி வகித்த சித்தராமையா, தோ்தலில் அளித்த வாக்குறுதிகளை 99 சதவீதம் நிறைவேற்றியுள்ளாா். பாஜக அளித்த எந்த வாக்குறுதிகளையும் நிறைவேற்றாமல் முடங்கிப்போய் உள்ளது. இதனால் வரும் சட்டப்பேரவைத் தோ்தலில் பாஜகவிற்கு பாடம் புகட்ட மக்கள் முடிவு செய்துள்ளனா் என்றாா்.