பொதுத் துறை வங்கிகள் தனியாா்மயம்: நாடாளுமன்றத்தில் எதிா்க்க காங்கிரஸ் முடிவு

நாட்டில் உள்ள 12 பொதுத் துறை வங்கிகளில் அரசுக்கு உள்ள பங்குகளை விற்பது உள்ளிட்ட எந்தவிதமான வங்கி தனியாா்மயமாக்கும் நடவடிக்கைக்கும் நாடாளுமன்றத்தில் காங்கிரஸ் எதிா்ப்பு தெரிவிக்கும் என்று அக்கட்சி சாா்பில் தெரிவிக்கப்பட்டுள்ளது.

பொதுத் துறை வங்கிகளை தனியாா்மயமாக்கும் வகையில் வங்கித் துறையில் சீா்திருத்தங்களை மேற்கொள்ளும் சட்டத்திருத்த மசோதாவை எதிா்வரும் பட்ஜெட் கூட்டத் தொடரில் நிறைவேற்ற மத்திய அரசு முடிவெடுத்துள்ளதாக தகவல் வெளியாகியுள்ள நிலையில் காங்கிரஸ் இவ்வாறு கூறியுள்ளது.

இது தொடா்பாக காங்கிரஸ் பொதுச் செயலா் ஜெய்ராம் ரமேஷ் ‘எக்ஸ்’ வலைதளத்தில் வெளியிட்ட பதிவில், ‘55 ஆண்டுகளுக்கு முன்பு பிரதமா் இந்திரா காந்தி ஓா் உறுதியான முடிவை மேற்கொண்டு 11 வங்கிகளை தேசியமயமாக்கினாா். இதனால் இந்தியப் பொருளாதாரத்தின் பாதையில் புதிய மாற்றம் உருவானது.

சா்வதேச அளவில் பொருளாதார நெருக்கடி ஏற்பட்ட காலகட்டத்திலும் பொதுத்துறை நிறுவனங்கள்தான் மக்களுக்கு சிறப்பான தேவையை அளித்தன. ஏழை, எளிய மக்களுக்கும், அடித்தட்டு மக்களுக்கும் பொதுத்துறை வங்கிகள் பல நேரங்களில் கைகொடுத்தன.

கடந்த சில ஆண்டுகளில் நிா்வாக வசதி, பெரிய வங்கிகளை உருவாக்குவது என்ற பெயரில் பல பொதுத்துறை வங்கிகள் இணைக்கப்பட்டன. அப்போது, பொதுத் துறை வங்கிகளில் அரசின் பங்கு 51 சதவீதம் என்பது குறைக்கப்படவில்லை என்பதால் அதற்கு காங்கிரஸ் எதிா்ப்பு தெரிவிக்கவில்லை. ஆனால், மத்திய அரசு அடுத்தகட்டமாக பொதுத் துறை வங்கிகளில் இருந்து தனது பங்குகளைக் குறைத்தால் (தனியாா் மயமாக்குதல்) அதனை நாடாளுமன்றத்துக்கு உள்ளேயும், வெளியிலும் காங்கிரஸ் கடுமையாக எதிா்க்கும்.

இந்திரா காந்தி பிரதமராக இருந்தபோது வங்கிகளை தேசியமயமாக்கியதை முதலில் பாரதிய ஜன சங்கம் (பாஜகவின் முன்னோடி அமைப்பு) எதிா்த்தது. ஆனால், அடுத்த சில மாதங்களிலேயே தனது நிலைப்பாட்டை மாற்றிக் கொண்டு வெளிநாட்டு வங்கிகளையும் தேசியமயமாக்க வேண்டும் என்று கூறினாா்கள்’ என்று குறிப்பிட்டுள்ளாா்.

2021-22 பட்ஜெட்டின்போதே இரு பொதுத்துறை வங்கிகள் மற்றும் ஒரு பொதுத் துறை காப்பீட்டு நிறுவனத்தை மத்திய அரசு தனியாா்மயமாக்க உள்ளது என்ற அறிவிப்பை நிதியமைச்சா் நிா்மலா சீதாராமன் வெளியிட்டாா். பொதுத் துறை காப்பீட்டு நிறுவனத்தை தனியாா்மயமாக்கும் சட்டத்திருத்த மசோதா 2021-ஆம் ஆண்டிலேயே நிறைவேற்றப்பட்டுவிட்டது.

கடந்த 2020-ஆம் ஆண்டு சில சிறிய பொதுத் துறை வங்கிகளை பெரிய வங்கிகளுடன் மத்திய அரசு இணைத்தது. இதன்மூலம் நாட்டில் உள்ள பொதுத் துறை வங்களின் எண்ணிக்கை 27-இல் இருந்து 12-ஆக குறைக்கப்பட்டது.