நியூசிலாந்துக்கு எதிரான 3-வது டெஸ்டில் சதமடித்து அணியைச் சரிவிலிருந்து மீட்டுக்கொண்டு வந்துள்ளார் பேர்ஸ்டோ.

முதல் இரு டெஸ்டுகளை வென்று தொடரை இங்கிலாந்து அணி கைப்பற்றியுள்ள நிலையில் 3-வது டெஸ்ட் லீட்ஸில் நடைபெற்று வருகிறது. டாஸ் வென்ற நியூசிலாந்து அணி பேட்டிங்கைத் தேர்வு செய்து முதல் இன்னிங்ஸில் 117.3 ஓவர்களில் 329 ரன்கள் எடுத்தது. டேரில் மிட்செல் 109 ரன்கள் எடுத்தார். ஜேக் லீச் 5 விக்கெட்டுகளை வீழ்த்தினார். 

இங்கிலாந்து அணி முதல் இன்னிங்ஸில் முதல் 6 விக்கெட்டுகளை 55 ரன்களுக்கு இழந்து தடுமாறியது. இதன்பிறகு ஜோடி சேர்ந்த ஜானி பேர்ஸ்டோ, ஓவர்டன் பிரமாதமாக விளையாடி அணியைச் சரிவிலிருந்து மீட்டுக்கொண்டு வந்தார்கள். பவுண்டரிகளாக அடித்துத் தள்ளி விரைவாக ரன்கள் எடுத்த பேர்ஸ்டோ, 95 பந்துகளில் 15 பவுண்டரிகளுடன் சதத்தைப் பூர்த்தி செய்தார். கடைசிவரை பேர்ஸ்டோ - ஓவர்டன் ஜோடியை நியூசி. அணியால் பிரிக்கவே முடியவில்லை. இங்கிலாந்து அணி, 2-ம் நாள் முடிவில் 49 ஓவர்களில் 6 விக்கெட் இழப்புக்கு 264 ரன்கள் எடுத்தது. பேர்ஸ்டோ 130, ஓவர்டன் 89 ரன்களுடன் களத்தில் உள்ளார்கள்.