அயர்லாந்துக்கு எதிரான 2-வது டி20 போட்டியில் முதலில் பேட் செய்த இந்திய அணி 5 விக்கெட்டுகளை இழந்து 185 ரன்கள் குவித்துள்ளது.

பும்ரா தலைமையிலான இளம் இந்திய அணி அயர்லாந்து சுற்றுப்பயணம் மேற்கொண்டு 3 போட்டிகள் கொண்ட டி20 தொடரில் விளையாடி வருகிறது. முதல் போட்டியில் டக்வொர்த் லூயிஸ் முறையில் இந்திய அணி வெற்றி பெற்றதாக அறிவிக்கப்பட்டது. இந்த நிலையில், இரு அணிகளுக்கும் இடையிலான 2-வது டி20 போட்டி இன்று நடைபெற்று வருகிறது. 

இதையும் படிக்க: மகளிர் உலகக் கோப்பை கால்பந்து: ஸ்பெயின் சாம்பியன்!

இந்தப் போட்டியில் இந்தியா முதலில் பேட்டிங் செய்தது. தொடக்க ஆட்டக்காரர்களாக ஜெய்ஸ்வால் மற்றும் கெய்க்வாட் களமிறங்கினர். ஜெய்ஸ்வால் 18  ரன்களில் ஆட்டமிழந்தார். அவரைத் தொடர்ந்து களமிறங்கிய திலக் வர்மா 1 ரன்னில் ஆட்டமிழந்து ஏமாற்றமளித்தார். இந்த நிலையில், ருதுராஜ் உடன் ஜோடி சேர்ந்தார் சஞ்சு சாம்சன். இந்த ஜோடி சிறப்பாக விளையாடி அணியின் ஸ்கோரை உயர்த்தியது. அதிரடியாக விளையாடிய சஞ்சு சாம்சன் 26 பந்துகளில் 40 ரன்கள் குவித்து ஆட்டமிழந்தார். அதில் 5 பவுண்டரிகள் மற்றும் ஒரு சிக்ஸர் அடங்கும். மறுமுனையில் விளையாடிய ருதுராஜ் அரைசதம் அடித்து அசத்தினார். அவர் 43 பந்துகளில் 58 ரன்கள் எடுத்து ஆட்டமிழந்தார். அதில் 6 பவுண்டரிகள் மற்றும் ஒரு சிக்ஸர் அடங்கும். 

அதன்பின், களமிறங்கிய ரிங்கு சிங் அதிரடியாக விளையாடி 21 பந்துகளில் 38 ரன்கள் எடுத்து ஆட்டமிழந்தார். அதில் 2 பவுண்டரிகள் மற்றும் 3 சிக்ஸர்கள் அடங்கும். இறுதியில் ஷிவம் துபே இரண்டு சிக்ஸர்களை பறக்கவிட்டு அசத்தினார். நிர்ணயிக்கப்பட்ட 20 ஓவர்களின் முடிவில் இந்திய அணி 5 விக்கெட்டுகளை இழந்து 185 ரன்கள் எடுத்தது.

186 ரன்கள் எடுத்தால் வெற்றி என்ற இலக்கை நோக்கி அயர்லாந்து களமிறங்குகிறது.

இதையும் படிக்க: இது மிகப் பெரிய சாதனை; ஐக்கிய அரபு அமீரகத்தை பாராட்டிய அஸ்வின்!

இன்றையப் போட்டியில் வெற்றி பெற்று தொடரை வெல்லும் முனைப்பில் இந்தியாவும், தொடரை இழக்காமலிருக்க  வெற்றிப் பெற்றாக வேண்டும் என்ற கட்டாயத்தில் அயர்லாந்து அணியும் விளையாடி வருவது குறிப்பிடத்தக்கது.