வட மாநில இளைஞர் கல்லால் அடித்துக் கொலை

சென்னை பள்ளிக்கரணை அருகே வட மாநில இளைஞர் கல்லால் அடித்துக் கொலை செய்யப்பட்டது குறித்து போலீஸார் விசாரணை நடத்தி வருகின்றனர்.
 பள்ளிக்கரணை அருகே பெரும்பாக்கம் நூக்கம்பாளையம் காந்தி தெருவில் திங்கள்கிழமை காலை அடையாளம் தெரியாத ஒரு இளைஞர் தலையில் கல்லால் தாக்கப்பட்டு, கொலை செய்யப்பட்டுக் கிடந்தார். இதைப் பார்த்த அந்தப் பகுதி மக்கள், பள்ளிக்கரணை போலீஸாருக்கு தகவல் தெரிவித்தனர்.
 போலீஸார் சடலத்தைக் கைப்பற்றி விசாரணை மேற்கொண்டனர். அதில் இறந்தவர் 22 வயது மதிக்கத்தக்கவர் என்பதும், வட மாநிலத்தைச் சேர்ந்தவர் என்பதும் தெரியவந்தது. ஆனால் அவர் யார்? எந்தப் பகுதியைச் சேர்ந்தவர்? எதற்காக கொலை செய்யப்பட்டார்? போன்ற தகவல்கள் போலீஸாருக்கு உடனடியாகத் தெரியவில்லை.
 இது தொடர்பாக போலீஸார் வழக்குப் பதிவு செய்து, விசாரணை நடத்தி வருகின்றனர்.