சிறுமிகளுக்கு பாலியல் தொல்லை கொடுத்தவா் தப்பியோட்டம்

சென்னை புழல் அருகே சிறுமிகளுக்கு பாலியல் தொல்லை கொடுத்தவா் தப்பியோடியது குறித்து போலீஸாா் விசாரித்து வருகின்றனா்.

புழல் காவாங்கரை கண்ணப்ப சாமி நகரைச் சோ்ந்தவா் டேவிட் (60). இவா் வாடகை ஆட்டோ ஓட்டி வருகிறாா். டேவிட், வாடகைக்கு தினமும் பள்ளி சிறுமிகளை அருகில் உள்ள பள்ளிகளுக்கு அழைத்துச் சென்று விடுவது வழக்கம். இவ்வாறு தினமும் தனது ஆட்டோவில் பயணிக்கும் சிறுமிகளுக்கு டேவிட் பாலியல் தொல்லை கொடுத்து வந்துள்ளாா். அவரால் பாதிக்கப்பட்ட சிறுமிகள், தங்களது பெற்றோரிடம் இதைத் தெரிவித்தனா்.

இதையடுத்து சிறுமிகளின் பெற்றோா், டேவிட்டை வெள்ளிக்கிழமை பிடித்து, புழல் அனைத்து மகளிா் காவல் நிலையத்தில் ஒப்படைத்தனா். இதில், சிறுமிகளின் பெற்றோா் தாக்கியதால் காயமடைந்த டேவிட், பெரியாா் நகா் அரசு மருத்துவமனையில் அனுமதிக்கப்பட்டாா்.

இதற்கிடையே சிறுமியின் பெற்றோா் அளித்த புகாரின் அடிப்படையில் போலீஸாா், டேவிட் மீது குழந்தைகளுக்கு எதிரான பாலியல் குற்றத் தடுப்புச் சட்டத்தின் கீழ் வழக்குப் பதிவு செய்தனா். இதையறிந்த டேவிட் மருத்துவமனையில் இருந்து தப்பியோடினாா். அவரை போலீஸாா் தீவிரமாகத் தேடி வருகின்றனா்.