சமத்துவ மக்கள் கட்சி நிர்வாகிகள் கூட்டம்

அகில இந்திய சமத்துவ மக்கள் கட்சியின் ஈரோடு மாவட்ட நிர்வாகிகள் கூட்டம் வெள்ளிக்கிழமை நடைபெற்றது.

 இக்கூட்டத்துக்கு, கோபி மாநில துணை பொதுச் செயலாளர் சண்முகசுந்தரம் தலைமை வகித்தார். ஈரோடு வடக்கு மாவட்டச் செயலாளர் கணேசன், ஈரோடு மாநகர் கிழக்கு மாவட்டச் செயலாளர் சின்னசாமி, தெற்கு மாவட்டச் செயலாளர் சீனிவாசன் ஆகியோர் முன்னிலை வகித்தனர்.

 கூட்டத்தில், இலங்கையில் நடந்த போர் குற்றங்கள் குறித்து சர்வதேச நீதிமன்றம் விசாரணை நடத்த வேண்டும், இலங்கை அரசை கண்டித்து செப்டம்பர் மாதம் 29-ஆம் தேதி ஈரோட்டில் ஆர்ப்பாட்டம் நடத்த வேண்டும்.  கோபியில் நடைபெறும் காமராஜர் மணி மண்டப நிதியளிப்பு விழா, பொதுக் கூட்டத்துக்கு வருகை தரும் சட்டப்பேரவை உறுப்பினர் சரத்குமார், ராதிகா சரத்குமார், மாநில நிர்வாகிகளுக்கு சிறப்பான வரவேற்பு அளிக்க வேண்டும், விழாவில் ஈரோடு மாவட்டத்தின் சார்பில் 10 ஆயிரம் பேர் கலந்துகொள்வது என்பன உள்ளிட்ட தீர்மானங்கள் நிறைவேற்றப்பட்டன.

 இதில், பெருந்துறை சட்டப்பேரவை தொகுதிச் செயலாளர் செந்தில்குமார், ஈரோடு வடக்கு மாவட்ட இளைஞர் அணி செயலாளர் தேவராஜ், ஒன்றிய செயலாளர்கள் குருநாதன் (அந்தியூர்), வாசுதேவன் (கோபி) உள்பட பலர் கலந்துகொண்டனர்.