மின்மாற்றி வெடித்து காயமான இளைஞருக்கு நிதியுதவி

ஈரோட்டில் மின்மாற்றி வெடித்து காயமான இளைஞருக்கு மாவட்ட ஆட்சியரின் விருப்பக் கொடை நிதியில் இருந்து ரூ. 10 ஆயிரம் நிதியுதவி வழங்கப்பட்டது.

 ஈரோடு முனிசிபல் காலனி, விநாயகர் கோயில் அருகே உள்ள மின்மாற்றி சில தினங்களுக்கு முன் திடீரென வெடித்தது. இதிலிருந்து தீப்பொறிகள், சூடான எண்ணெய் கீழே கொட்டியது.

 அப்போது, அவ்வழியாக ஈரோடு அருகே உள்ள நசியனூரைச் சேர்ந்த சுப்பிரமணி என்பவர் இருசக்கர வாகனத்தில் சென்று கொண்டிருந்தபோது, அவர் மீது எண்ணெய் விழுந்தது. இதில், அவரது உடல் முழுவதும் தீக்காயம் ஏற்பட்டது.

 இதையடுத்து, அக்கம்பக்கத்தினர் அவரை மீட்டு ஈரோடு அரசு மருத்துவமனையில் சிகிச்சைக்காக சேர்த்தனர். அங்கு அவருக்கு சிகிச்சை அளிக்கப்பட்டு வருகிறது.

 இந்நிலையில், சிகிச்சை பெற்று வரும் சுப்பிரமணிக்கு ஈரோடு மாவட்ட ஆட்சியரின் விருப்ப நிதியில் இருந்து ரூ. 10 ஆயிரம் நிவாரண நிதியாக வழங்கப்பட்டது.

 இதை சுப்பிரமணியத்தின் மனைவி ஹேமலதாவிடம் ஈரோடு வட்டாட்சியர் மோகனா வெள்ளிக்கிழமை வழங்கினார்.