கல்லட்டி மலைப் பகுதி காட்சி முனையை சீரமைக்க வேண்டும்: சுற்றுலா ஆர்வலர்கள் கோரிக்கை

உதகை அருகே உள்ள கல்லட்டி மலைப் பகுதி காட்சி முனையை சீரமைக்க வேண்டும் என்று சுற்றுலா ஆர்வலர்கள் மாவட்ட  நிர்வாகத்தை  வலியுறுத்தியுள்ளனர்.  
உதகையிலிருந்து கல்லட்டி, மசினகுடி, மாயார் வழியாக ஏராளமான சுற்றுலாப் பயணிகள் பயணிக்கின்றனர். 
சுற்றுலாப் பயணிகள் கல்லட்டி மலைப் பாதையிலிருந்து பார்க்கும்போது கொண்டை ஊசி வளைவு,  ஆங்காங்கே தோன்றும் அருவிகளை ரசித்து  செல்கின்றனர். 
இதில், கல்லட்டி "பைசன்ஸ் வேலி' பகுதியில் வனத் துறை சார்பில் சுற்றுலாப் பயணிகள் ரசிக்கும் வகையில் கட்டப்பட்டுள்ள காட்சிமுனை பகுதி பராமரிப்பு இல்லாமல் புதர் மண்டிக் கிடக்கிறது. 
இதனால்,  சுற்றுலாப் பயணிகள் அதிருப்தி அடைகின்றனர். எனவே, காட்சிமுனைப் பகுதியை பொலிவுப்படுத்த வேண்டும் என்று சுற்றுலா ஆர்வலர்கள் மாவட்ட நிர்வாகத்தை வலியுறுத்தியுள்ளனர்.