இளம்பெண்ணை இழிவாக பேசியதாக மூவர் மீது வழக்குப் பதிவு

கம்பைநல்லூர் அருகே இளம்பெண்ணை இழிவாக பேசியதாக மூவர் மீது வன்கொடுமைத் தடுப்புச் சட்டத்தின் கீழ் போலீஸார் திங்கள்கிழமை வழக்குப் பதிவு செய்துள்ளனர்.

அரூர் வட்டம், கதிர்நாய்க்கன்ஹள்ளி கிராமத்தைச் சேர்ந்த சிலம்பரசன் மனைவி மகேஸ்வரி (22). இவருக்கும், அதே ஊரைச் சேர்ந்த விவசாயி கார்த்திகேயன் குடும்பத்தினருக்கும் இடையே நிலத் தகராறு இருந்ததாகக் கூறப்படுகிறது.

இந்த நிலையில் மகேஸ்வரியை கார்த்திகேயன் குடும்பத்தினர் ஜாதிப் பெயரைச் சொல்லி தகாத வார்த்தையில் பேசியதாகக் கூறப்படுகிறது. இதனையடுத்து மகேஸ்வரி அளித்த புகாரின் பேரில், கதிர்நாய்க்கன்ஹள்ளி கிராமத்தைச் சேர்ந்த கிருஷ்ணன் மகன்கள் கார்த்திகேயன் (60), தமிழ்ச்செல்வன் (50), தமிழ்ச்செல்வன் மனைவி அனுசுபா (45) ஆகிய மூவர் மீதும் வன்கொடுமைத் தடுப்புச் சட்டத்தின் கீழ் கம்பைநல்லூர் போலீஸார் வழக்குப் பதிவு செய்துள்ளனர்.