கோயில் பூசாரி ஜீவசமாதி அடையப்போவதாக தகவல் பரவியதால் பரபரப்பு

தேன்கனிக்கோட்டை அருகே சிவன்கோயில் பூசாரி செவ்வாய்க்கிழமை (செப்.15) ஜீவசமாதி அடையப்போவதாக கட்செவி அஞ்சல் (வாட்ஸ்அப்) மூலம் தகவல் பரவியதால் பரபரப்பு ஏற்பட்டது.

கிருஷ்ணகிரி மாவட்டம், தேன்கனிக்கோட்டை வட்டம், அய்யூர் அருகேயுள்ள

குருபட்டி கிராமத்தைச் சேர்ந்தவர் மாராச்சாரி (90). இவரது மனைவி ருக்மணியம்மாள் (78). இந்தத் தம்பதிக்கு நான்கு மகன்கள், 3 மகள்கள் உள்ளனர்.

கடந்த 30 ஆண்டுகளுக்கும் மேலாக, அங்குள்ள சிவன் கோயிலில் மாராச்சாரி பூசாரியாக இருந்து வருகிறார். இந்த நிலையில், கோயில் அருகே குழி தோண்டி வைத்துள்ள பூசாரி மாராச்சாரி, தான் இறந்த பின்னர் அந்த இடத்தில் தனது உடலைப் புதைக்க வேண்டும் என கிராம மக்களிடம் கூறினாராம். இதற்கிடையே கட்செவி அஞ்சல் (வாட்ஸ்அப்) மூலம் பூசாரி மாராச்சாரி செவ்வாய்க்கிழமை ஜீவசமாதி அடையப்போவதாக தகவல் பரவியது.

இதுகுறித்து தகவல் அறிந்த தேன்கனிக்கோட்டை வட்டாட்சியர் கோவிந்தன், காவல் நிலைய ஆய்வாளர் சரவணன் தலைமையிலான போலீஸார் குருபட்டிக்கு சென்று உயிருடன் இருக்கும் நபர் இறப்பதற்கு முன்பாக அவரை

அடக்கம் செய்வதற்காகக் குழி தோண்டி வைத்திருப்பது சட்டப்படி குற்றம் என்றனர்.

இதையடுத்து அந்தக் குழி மூடப்பட்டது.