ஊத்தங்கரை அருகே டியூஷனுக்கு சென்ற 7 ஆம் வகுப்பு மாணவரை காணவில்லை எனப் புகாா்!

கிருஷ்ணகிரி மாவட்டம், ஊத்தங்கரை அருகே டியூஷனுக்கு சென்ற 7 ஆம் வகுப்பு மாணவா் காணாமல் போனது குறித்து போலீஸாா் வழக்குப் பதிவுசெய்து விசாரணை நடத்தி வருகின்றனா்.

ஊத்தங்கரையை அடுத்த சிங்காரப்பேட்டை இந்தியன் வங்கி தெருவைச் சோ்ந்தவா் திருநாவுக்கரசு. இவா், அதே பகுதியில் பேக்கரி வைத்துள்ளாா். இவரது மகன் சஞ்சய் (12), ஊத்தங்கரையில் உள்ள தனியாா் பள்ளியில் ஏழாம் வகுப்பு படித்து வருகிறாா்.

இவா், வெள்ளிக்கிழமை மாலை பள்ளியில் இருந்து வீடுதிரும்பியப் பிறகு, டியூஷன் செல்வதாகக் கூறி சென்றுள்ளாா். நீண்டநேரம் ஆகியும் சஞ்சய் வீடுதிரும்பாததால், அவரது பெற்றோா் சிங்காரப்பேட்டை காவல் நிலையத்தில் புகாா் அளித்தனா்.

இதன்பேரில், போலீஸாா் வழக்குப் பதிவு செய்து விசாரணை நடத்தி வருகின்றனா். இதன் ஒருபகுதியாக அந்தப் பகுதியில் உள்ள சிசிடிவி கேமராக்களை ஆய்வு செய்தனா்.

அதில், சிறுவன் சஞ்சய் அந்த வழியாக வந்த இருசக்கர வாகனத்தில் லிப்ட் கேட்டு செல்வது கேமராவில் பதிவாகி இருந்தது. இதையடுத்து, அவரை அழைத்துச் சென்றது யாா்?, சிறுவன் கடத்தப்பட்டாரா என்பது குறித்து போலீஸாா் தீவிர விசாரணை நடத்தி வருகின்றனா்.