ஆட்சியர் அலுவலகம் முன் அங்கன்வாடி ஊழியர் தீக்குளிக்க முயற்சி

நாமக்கல் மாவட்ட ஆட்சியர் அலுவலகம் எதிரே அங்கன்வாடி ஊழியர் தீக்குளிக்க முயற்சித்த சம்பவம் பரபரப்பை ஏற்படுத்தியது.

நாமக்கல் மாவட்டம், ராசிபுரம் அருகே தொட்டிவலசு கிராமத்தை சேர்ந்தவர் லோகநாயகி (40). அங்கன்வாடி ஊழியர். இவரது கணவர் எட்டியண்ணன் இரண்டு ஆண்டுகளுக்கு முன்பு இறந்துவிட்டார்.

இந்த நிலையில், எட்டியண்ணனுக்குச் சொந்தமான வீடு, சொத்துக்களை அவரது பெற்றோர், சகோதரி மற்றும் உறவினர்கள் சிலர் அபகரித்துக் கொண்டனராம். மேலும், லோகநாயகி குடியிருந்து வந்த வீட்டையும் தீ வைத்து எரித்துவிட்டனராம்.

இதுகுறித்து ராசிபுரம் காவல் நிலையத்தில் லோகநாயகி பலமுறை புகார் அளித்தும் எந்த நடவடிக்கையும் எடுக்கப்படவில்லையாம். இதையடுத்து, நாமக்கல் மாவட்ட ஆட்சியர் அலுவலகத்துக்கு திங்கள்கிழமை வந்த லோகநாயகி மண்ணெண்ணெய்யை உடலில் ஊற்றி தீக்குளிக்க முயன்றார். இதைக் கண்ட காவலர்கள் அவரை மீட்டுனர்.

தகவலறிந்த நல்லிபாளையம் போலீஸார் லோகநாயகியை அழைத்து எச்சரித்தனர். மேலும், பிரச்னை குறித்து மாவட்ட ஆட்சியரிடம் தெரிவித்து தீர்வு காண நடவடிக்கை எடுப்பதாகக் கூறி அனுப்பிவைத்தனர்.