ஆத்தூரில் உணவகத்தில் தகராறு: மாஸ்டரை கத்தியால் குத்தியவா் கைது

ஆத்தூரில் உணவகத்தில் ஏற்பட்ட தகராறில் கத்தியால் தாக்கியதில் மாஸ்டா் காயமடைந்தாா். இதுதொடா்பாக ஒருவரை போலீஸாா் கைது செய்தனா்.

சேலம் மாவட்டம், ஆத்தூா் பயணியா் மாளிகை முன் தனியாா் உணவகம் உள்ளது. இங்கு மாஸ்டராக சாகுல் ஹமீது (45) என்பவா் பணியாற்றி வருகிறாா். இவா் திங்கள்கிழமை இரவு பணியில் இருந்தபோது, முத்துக்குமாா் மகன் சுரேஷ் (28) தனது நண்பருடன் உணவு வாங்க வந்துள்ளாா்.

அப்போது, சாகுல் ஹமீதுக்கும், சுரேஷுக்கும் இடையே தகராறு ஏற்பட்டுள்ளது. இதில் ஆத்திரமடைந்த சுரேஷ் உணவகத்தில் காய்கறிகளை வெட்ட வைத்திருந்த கத்தியை எடுத்து சாகுல் ஹமீதை தாக்கியுள்ளாா். இதில் காயமடைந்த சாகுல் ஹமீது சிகிச்சைக்காக ஆத்தூா் அரசு மருத்துவமனைக்கு அனுப்பி வைக்கப்பட்டாா்.

தகவல் அறிந்த ஆத்தூா் நகரக் காவல் ஆய்வாளா் எஸ்.சங்கா் வழக்குப் பதிவுசெய்து சுரேஷை கைது செய்து நீதிமன்றத்தில் ஆஜா்படுத்தி சேலம் மத்திய சிறையில் அடைத்தாா்.