விபத்தில் சிக்கி மூளைச்சாவு அடைந்த இளைஞா் உயிரிழப்பு

சேலம் அருகே விபத்தில் சிக்கி மூளைச்சாவு அடைந்த இளைஞா் சிகிச்சை பலனின்றி செவ்வாய்க்கிழமை அதிகாலை உயிரிழந்தாா்.

சேலம் இரும்பாலை அருகே உள்ள முருங்கப்பட்டியைச் சோ்ந்தவா் செல்வராஜ். இவரது மகன் கௌதம் (23). பெங்களூரில் வேலை செய்துவந்தாா். இவா் கடந்த ஞாயிற்றுக்கிழமை திருமலைகிரி 100 அடி சாலையில் விபத்தில் சிக்கினாா்.

இவா் ஓட்டிவந்த இருசக்கர வாகனம், அங்கு நின்று கொண்டிருந்த மற்றொரு வாகனம் மீது மோதியது. இதில் கௌதம் மற்றும் அவருடன் வந்த நண்பா்களான கோகுல்ராஜ், பொன். அசோக்குமாா் ஆகியோா் காயம் அடைந்தனா்.

இவா்கள் அனைவரும் சேலம் அரசு மருத்துவமனையில் சிகிச்சை பெற்று வந்தனா். இவா்களில் கௌதமின் உடல்நிலை கவலைக்கிடமாக இருந்தது.

இந்நிலையில் திங்கள்கிழமை அவரது மூளை செயலிழந்த நிலையில், உடல்உறுப்புக்களைத் தானம் செய்ய பெற்றோா் முடிவு செய்தனா். ஆனால், செவ்வாய்க்கிழமை அதிகாலை அவா் உயிரிழந்தாா். இதுகுறித்து இரும்பாலை போலீஸாா் விசாரணை நடத்தி வருகின்றனா்.