பழனியில் வாகன முகப்பு விளக்குகளில் கருப்புவில்லை ஒட்டும் நிகழ்ச்சி

பழனியில் சுழற் சங்கம் மற்றும் ரோட்ராக்ட் சங்கம் சார்பில், வாகனங்களின் முகப்பு விளக்கில் அதிக ஒளியை தடுக்கும் வகையில் ஞாயிற்றுக்கிழமை கருப்பு வில்லைகள் ஒட்டப்பட்டன.
      கன ரக, இலகு ரக மற்றும் இரு சக்கர வாகன முகப்பு விளக்குகளின் அதிக ஒளியை தடுக்கும் வகையில், கருப்பு வில்லை ஒட்ட வட்டாரப் போக்குவரத்துத் துறை அறிவுறுத்தியுள்ளது. அதன்படி,  பழனி சுழற் சங்கம் மற்றும் ரோட்ராக்ட் சங்கம் சார்பில் வாகன முகப்பு விளக்கில்  கருப்பு வில்லைகள் ஒட்டும் நிகழ்ச்சி, பேருந்து நிலையம் முன்பாக தொடங்கப்பட்டது. இந்நிகழ்ச்சியை, போக்குவரத்து ஆய்வாளர் மகேந்திரன் தலைமையேற்று தொடக்கி வைத்தார். பழனி சுழற் சங்கத் தலைவர் விஷ்ணுவர்த்தன், செயலர் பிரேம்நாத் உள்ளிட்டோர் முன்னிலை வகித்தனர். 
     இதில், அரசு பேருந்துகள், தனியார் பேருந்துகள், இலகு ரக வாகனங்கள், இரு சக்கர வாகனங்கள் என சுமார் ஆயிரம் வாகனங்களுக்கு கருப்பு வில்லைகள் ஒட்டப்பட்டன. மேலும், போக்குவரத்து விதிகள் குறித்தும், அவற்றை கடைப்பிடிக்க வலியுறுத்தியும் துண்டுப்பிரசுரம்  வழங்கப்பட்டது. விதியை மீறி அதிக ஒளி உமிழும் விளக்குகள், கூடுதல் விளக்குகள் பொருத்திய வாகனங்களின் உரிமையாளர்களிடம் அவற்றை அகற்ற வலியுறுத்தப்பட்டது.         நிகழ்ச்சியில், சுழற் சங்க முன்னாள் தலைவர் சண்முகநாதன், ஆனந்த் உள்ளிட்ட பலர் பங்கேற்றனர்.