திண்டுக்கல்லில் 22 ரெளடிகள் கைது

திண்டுக்கல்லில் பொதுமக்களுக்கு இடையூறு ஏற்படுத்தி வந்த 22 ரெளடிகளை போலீஸாா் செவ்வாய்க்கிழமை கைது செய்தனா்.

திண்டுக்கல் மாவட்டத்தில் பொதுமக்களுக்கு இடையூறு ஏற்படுத்தும் வகையிலும், சட்டவிரோத குற்றச் செயல்களிலும் ஈடுபட்டு வந்த 34 ரெளடிகள் மீது நடவடிக்கை எடுக்க மாவட்ட காவல் கண்காணிப்பாளா் ச.ஜெயக்குமாா் உத்தரவிட்டாா்.

இதன்படி, திண்டுக்கல் நகா், ஊரகம், ஒட்டன்சத்திரம் பகுதியில் தலா 4 ரெளடிகள், பழனியில் 5 ரெளடிகள், வேடசந்தூரில் 3 ரெளடிகள், கொடைக்கானல், நிலக்கோட்டையில் தால ஒரு ரெளடி என மொத்தம் 22 ரெளடிகள் செவ்வாய்க்கிழமை கைது செய்யப்பட்டனா்.

மேலும், குற்றச் செயல்களில் ஈடுபடக் கூடாது என்ற நன்னடத்தை உறுதிமொழி பெறப்பட்டு, 34 ரெளடிகளுக்கு கடுமையான எச்சரிக்கை விடுக்கப்பட்டு அனுப்பி வைக்கப்பட்டனா்.

இதேபோல, மாவட்டம் முழுவதும் 538 ரெளடிகள் காவல் துறையின் தீவிர கண்காணிப்பு வளையத்துக்குள் கொண்டு வரப்பட்டுள்ளனா்.

இதுகுறித்து மாவட்ட காவல் கண்காணிப்பாளா் த.ஜெயக்குமாா் தெரிவித்ததாவது: திண்டுக்கல் மாவட்டத்தில் 22 ரெளடிகள் கைது செய்யப்பட்டனா். மேலும், மது அருந்திவிட்டு வாகனம் ஓட்டியதாக 78 வழக்குகள், அதிவேகமாகவும், அலட்சியமாகவும் வாகனம் ஓட்டியதாக 265 வழக்குகள், மது அருந்திவிட்டு பொதுமக்களுக்கு இடையூறு ஏற்படுத்தியதாக 41 போ் மீது வழக்குப் பதிவு செய்யப்பட்டிருக்கிறது.

திண்டுக்கல் மாவட்டத்தில் பொதுமக்களின் அமைதிக்கு இடையூறு ஏற்படுத்தினாலோ, சட்ட விரோத செயல்களில் ஈடுபட்டாலோ சம்மந்தப்பட்ட ரெளடிகள் மீது குண்டா் தடுப்புச் சட்டத்தின் கீழ் நடவடிக்கை எடுக்கப்படும் என்றாா் அவா்.