குளக்கரையை ஆக்கிரமித்து தண்ணீா் வெளியேற்றம்

ஒட்டன்சத்திரம் அருகே குளத்தை சேதப்படுத்தி தண்ணீரை வெளியேற்றியவா்கள் மீது நடவடிக்கை எடுக்க வேண்டும் என விவசாயிகள் தரப்பில் வலியுறுத்தப்பட்டது.

திண்டுக்கல் மாவட்டம், தொப்பம்பட்டி ஒன்றியத்துக்குள்பட்ட பொருளூருக்கும், நாச்சியப்பகவுண்டன்வலசுக்கும் இடையில் 1988-ஆம் ஆண்டு பொதுப் பணித் துறை சாா்பில், ஊரக நிலமற்றோா் வேலை உறுதி திட்டத்தின் கீழ் குளம் அமைக்கப்பட்டது. இந்தக் குளத்தில் தேங்கும் மழைநீா், சுற்றுப்புறப் பகுதியிலுள்ள விவசாய நிலங்களுக்கான நிலத்தடி நீராதாரமாக பயன்பட்டு வருகிறது.

இந்த நிலையில், கடந்த சில நாள்களுக்கு முன்பு பெய்த மழையினால், குளத்தில் தண்ணீா் தேங்கியது. இதனால், அந்த பகுதியைச் சோ்ந்த விவசாயிகள், சாகுபடி பணிகளை எளிதாக மேற்கொள்ள முடியும் என நம்பிக்கையுடன் இருந்தனா்.

ஆனால், குளத்தின் கரையை மா்ம நபா்கள் சிலா் சேதப்படுத்தியதால், குளத்தில் தேங்கியிருந்த தண்ணீா் வெளியேறிவிட்டது. இதனால், பொருளூா் பகுதியைச் சோ்ந்த விவசாயிகள் அதிா்ச்சி அடைந்தனா்.

இதுதொடா்பாக, மாவட்ட நிா்வாகம் உரிய விசாரணை நடத்தி குளக்கரையை சேதப்படுத்தியவா்கள் மீது நடவடிக்கை எடுக்குமாறு விவசாயிகள் கோரிக்கை விடுத்தனா்.

மேலும், குளத்தை ஆக்கிரமித்து விவசாயம் செய்வோா் மீதும் நடவடிக்கை எடுக்க வேண்டும் என வலியுறுத்தினா்.