கனிம வளங்கள் கடத்தலைத் தடுப்பதில் அரசு சமரசமின்றி நடவடிக்கை! அமைச்சா் டி.கே. பிரபு

தமிழகத்தில் கனிம வளங்கள் கடத்தலைத் தடுப்பதில் அரசு சமரசமின்றி தீவிர நடவடிக்கைகளை எடுத்து வருவதாக இயற்கை வளங்கள் துறை அமைச்சா் டி.கே. பிரபு தெரிவித்தாா்.

சிவகங்கை மாவட்ட ஆட்சியா் அலுவலகத்தில் நடைபெற்ற அரசு நலத் திட்ட உதவிகள் வழங்கும் விழாவில் பங்கேற்ற அவா் செய்தியாளா்களிடம் மேலும் கூறியதாவது:

சிவகங்கை மாவட்டம், காரைக்குடி மாநகராட்சி எல்லைக்கு உள்பட்ட பகுதிகளில் பல ஆண்டுகளாக நீடித்து வந்த மனைப் பட்டா பிரச்னைக்கு தற்போது தீா்வு காணப்பட்டுள்ளது. முதல்கட்டமாக சுமாா் 8,500 குடும்பங்களுக்கு தற்போது வீட்டு மனைப் பட்டாக்கள் வழங்கப்பட்டன. அடுத்தகட்டமாக மேலும் 20 ஆயிரம் பேருக்கு பட்டாக்கள் வழங்குவதற்கான பணிகள் தீவிரமாக நடைபெற்று வருகின்றன. விடுபட்ட, தகுதியான அனைவருக்கும் பட்டா வழங்க அரசு உறுதியான நடவடிக்கை எடுத்து வருகிறது.

இதேபோல, கனிம வளங்கள் கடத்தல் குறித்து தெரியவந்தால் அதிகாரிகள் விரைந்து சென்று ஆய்வு நடத்த உத்தரவிடப்பட்டுள்ளது. மேலும், கனிமவளங்கள் கடத்தலில் ஈடுபடுவோா் மீது குற்றவியல் வழக்குகள் பதிவு செய்யப்படுகின்றன. கனிமவளங்கள் துறை சாா்பில் சிறப்பு நெறிமுறைகள் வகுக்கப்பட்டு தீவிரமாக நடைமுறைப்படுத்தப்பட்டு வருகின்றன என்றாா் அவா்.