சமூக பாதுகாப்புத் திட்ட பயனாளிகள் கவனத்துக்கு...

சமூக பாதுகாப்புத் திட்டத்தின் கீழ், தேனி மாவட்டத்தில் ஓய்வூதியம் பெற்று வரும் பயனாளிகள் முகவரி மாற்றம் குறித்து சான்றிதழ் சமர்ப்பிக்க வேண்டும் என்று அறிவிக்கப்பட்டுள்ளது.

   இது குறித்து, மாவட்ட ஆட்சியர் ந. வெங்கடாசலம் வெளியிட்டுள்ள அறிவிப்பு: சமூகப் பாதுகாப்புத் திட்டத்தின் கீழ், இந்திரா காந்தி தேசிய முதியோர் ஓய்வூதியம், விதவை ஓய்வூதியம், மாற்றுத் திறனாளிகள் ஓய்வூதியம், முதிர்கன்னிகள் உதவித் தொகை ஆகிய பயன்களை பெற்று வரும் பயனாளிகள், தற்போது முகவரி மாறி குடியிருந்தால், ஏற்கெனவே வசித்து வந்த பகுதியின் கிராம நிர்வாக அலுவலர், வருவாய் ஆய்வாளர், சமூகப் பாதுகாப்புத் திட்ட தனி வட்டாட்சியர் ஆகியோரிடம் விண்ணப்பித்து, முகவரி மாற்றத்துக்கு சான்றிதழ் பெறவேண்டும்.

  இந்தச் சான்றிதழுடன், புதிதாக தொடங்கிய வங்கிக் கணக்கு எண்ணையும் இணைத்து, தற்போது குடியிருக்கும் பகுதிக்கான சமூகப் பாதுகாப்புத் திட்ட தனி வட்டாட்சியரிடம் சமர்ப்பித்து, தொடர்ந்து ஓய்வூதியம் பெறலாம் என்று அறிவிக்கப்பட்டுள்ளது.