பள்ளிச் சிறுவன் மீது பைக் மோதல்: மூவர் மீது வழக்கு

சிவகாசி அருகே முன்பகை காரணமாக, பள்ளிச் சிறுவன் மீது இரு சக்கர வாகனத்தை மோதவிட்டு, காயமேற்படுத்திய ஒரே குடும்பத்தைச் சேர்ந்த 3 பேர் மீது, போலீஸார் திங்கள்கிழமை வழக்குப் பதிவு செய்துள்ளனர்.
சிவகாசி அருகே நடுவப்பட்டியைச் சேர்ந்தவர் மாரீஸ்வரன் (33). இவரது குடும்பத்துக்கும், வீரமணி என்பவரின் குடும்பத்தினருக்கும் முன்பகை இருந்துள்ளது.
இந்நிலையில், நடுவப்பட்டி இந்து நடுநிலைப் பள்ளியில் மூன்றாம் வகுப்பு படித்து வரும் மாரீஸ்வரன் மகன் வீரசிங்கம் (8), திங்கள்கிழமை அப் பள்ளி முன்பாக விளையாடிக் கொண்டிருந்துள்ளார். அப்போது, அப்பகுதியில் மொபட்டில் சென்றுகொண்டிருந்த வீரமணியின் மகன்கள் வீரசிங்கம், கணேஷ்குமார் மற்றும் மகள் வீரலட்சுமி ஆகியோர் வேண்டுமென்றே மாரீஸ்வரன் மகன் மீது மோதியதில், சிறுவன் காயமடைந்தான். மேலும், இதை யாரிடமாவது கூறினால் கொலை செய்து விடுவோம் என மிரட்டியுள்ளனர். 
காயடைந்த சிறுவன், சிவகாசி அரசு மருத்துவமனையில் சிகிச்சை பெற்றான்.இது குறித்து மாரீஸ்வரன் அளித்த புகாரின்பேரில், திருத்தங்கல் போலீஸார் வீரசிங்கம், கணேஷ்குமார் மற்றும் வீரலட்சுமி ஆகிய மூவர் மீதும் வழக்குப் பதிந்து விசாரித்து வருகின்றனர்.