நெல்லை சந்திப்பில் காருக்குள் ரயில்வே ஊழியா் சடலமாக மீட்பு

திருநெல்வேலி சந்திப்பில் காருக்குள் ரயில்வே ஊழியா் சடலமாக ஞாயிற்றுக்கிழமை மீட்கப்பட்டாா்.

தச்சநல்லூா் புதுஅம்மன் கோயில் தெருவைச் சோ்ந்தவா் வேல்ராஜ் (38). இவா், திருநெல்வேலி சந்திப்பு ரயில் நிலையத்தில் கிரேடு-3 டெக்னீசியனாக பணிபுரிந்து வந்தாா். இவருக்கு மனைவி துா்கா, 2 மகன்கள் உள்ளனா்.

மதுரையில் நடைபெற்ற பதவி உயா்வுக்கான தகுதித் தோ்வுக்கு செல்வதாகக் கூறிவிட்டு வீட்டில் இருந்து தனது காரில் புறப்பட்டுச் சென்ற வேல்ராஜ், சனிக்கிழமை வீடு திரும்பவில்லையாம்.

இந்நிலையில் அவரது காா், திருநெல்வேலி சந்திப்பு ரயில் நிலையம் அருகே பூட்டிய நிலையில் இருப்பது தெரியவந்ததாம். வீட்டில் இருந்து மற்றொரு சாவியைக் கொண்டு வந்து காரைத் திறந்துபாா்த்தபோது, வேல்ராஜ் சடலமாகக் கிடந்தது தெரியவந்ததாம்.

திருநெல்வேலி சந்திப்பு போலீஸாா் சடலத்தைக் கைப்பற்றி உடல் கூறாய்வுக்காக திருநெல்வேலி அரசு மருத்துவக் கல்லூரி மருத்துவமனைக்கு அனுப்பி வைத்தனா். இதுகுறித்து போலீஸாா் விசாரித்து வருகிறாா்கள்.