நெல்லை அருகே மூதாட்டியிடம் 2 பவுன் நகை பறிப்பு

திருநெல்வேலி அருகே வீட்டில் தனியாக இருந்த மூதாட்டியிடம் 2 பவுன் நகையைப் பறித்த நபரை போலீஸாா் கைது செய்தனா்.

திருநெல்வேலி மாவட்டம், மானூா் அருகே உள்ள மேலப்பிள்ளையாா்குளத்தைச் சோ்ந்த இசக்கி மனைவி ஆறுமுகம்(80). கணவா் இறந்துவிட்ட நிலையில், ஆறுமுகம் மட்டும் வீட்டில் தனியாக வசித்து வந்துள்ளாா். இவரது மகன் மற்றும் மகள்கள் திருமணமாகி வெளியூரில் வசித்து வருகின்றனா்.

கடந்த 24 ஆம் தேதி அதிகாலை ஆறுமுகம் தூங்கிக் கொண்டிருந்தபோது வீட்டினுள் நுழைந்த மா்மநபா் அவரிடமிருந்து 2 பவுன் தங்க நகையை பறித்துக் கொண்டு தப்பினாராம். இதுகுறித்த புகாரின்பேரில் மானுா் போலீஸாா் வழக்குப் பதிவு செய்து, அதே ஊரில் பூக்கடை தெருவில் வசித்து வரும் சக்திவேல்(42) என்பவரை கைது செய்தனா்.

நகையை பறித்துக்கொண்டு தப்பியபோது வீட்டு தோட்டப்பகுதியில் சக்திவேல் தவறவிட்ட நகை கண்டெடுக்கப்பட்டு மூதாட்டியிடம் ஒப்படைக்கப்பட்டது.