நாகர்கோவிலில் குடும்ப பிரச்னையில் 2  குழந்தைகளைக் கொன்று தாய் தற்கொலை

நாகர்கோவிலில் குடும்ப பிரச்னை காரணமாக, 2 குழந்தைகளைக் கொன்றுவிட்டு தாய் தற்கொலை செய்து கொண்ட சம்பவம்  பெரும் பரபரப்பை ஏற்படுத்தியுள்ளது.
குமரி மாவட்டம், கிருஷ்ணன்கோவில் பகுதியைச் சேர்ந்தவர் அருணாச்சலம் (37), ஆட்டோ ஓட்டுநரான இவருக்கும், பூதப்பாண்டி பகுதியைச் சேர்ந்த சரண்யா(32) என்பவருக்கும் கடந்த 5 ஆண்டுகளுக்கு முன்பு திருமணம் நடைபெற்றது. இவர்களது மகள் ரிப்கா(4), மகன் ஐசக் ஆபிரகாம் (2). இவர்கள் நாகர்கோவில் எஸ்.எல்.பி. பள்ளி தெற்குத் தெருவில் வாடகை வீட்டில் வசித்து வந்தனர்.
தம்பதியர் இடையே குடும்பத் தகராறு இருந்து வந்ததாகவும், ஏற்கெனவே இதுதொடர்பாக காவல் நிலையம் சென்ற இருவரையும் போலீஸார் சமரசம் செய்துவைத்ததாகவும் கூறப்படுகிறது.
இந்நிலையில், ஞாயிற்றுக்கிழமை காலை தம்பதி இடையே  மீண்டும் தகராறு ஏற்பட்டுள்ளது. மனைவியுடன் தகராறில் ஈடுபட்டுவிட்டு வெளியே சென்ற அருணாசலம், சிறிது நேரம் கழித்து வீடு திரும்பினார். அப்போது வீட்டில் சரண்யா சேலையில் தூக்கிட்ட நிலையில் சடலமாக தொங்கியுள்ளார். சிறிது தூரத்தில் குழந்தைகள் இருவரும் உயிரிழந்து கிடந்தனர்.
இதைப் பார்த்து அதிர்ச்சியடைந்த அருணாசலம் போலீஸாருக்கு தகவல் அளித்தார். சம்பவ இடத்துக்கு வந்த கோட்டார் போலீஸார், 3 பேரின் சடலத்தையும் மீட்டு பிரேத பரிசோதனைக்காக ஆசாரிப்பள்ளம் அரசு மருத்துவக் கல்லூரி மருத்துவமனைக்கு அனுப்பி வைத்தனர். 
கணவருடன் தகராறில் குழந்தைகளை கழுத்தை நெரித்து கொலை செய்துவிட்டு சரண்யா தூக்கிட்டு தற்கொலை செய்துகொண்டது முதல்கட்ட விசாரணையில் தெரியவந்துள்ளதாக போலீஸார் தெரிவித்தனர்.
சரண்யாவுக்கு திருமணமாகி 5 ஆண்டுகளே ஆவதால் இந்த சம்பவம் குறித்து,  வருவாய்க் கோட்டாட்சியர் விசாரணைக்கு உத்தரவிடப்பட்டுள்ளது.