தென்காசி மாவட்டத்தில் ரூ. 100 கோடியில் தொழில், கல்வி கடனுதவிகள் வழங்கல்

தென்காசி மாவட்டத்தில் 1,461 பேருக்கு தொழில் கடன், 156 பேருக்கு கல்விக் கடன் என மொத்தம் 1, 617 பேருக்கு ரூ. 100 கோடியில் கடனுதவிகள் வழங்கப்பட்டுள்ளதாக மாவட்ட ஆட்சியா் ரஞ்ஜீத் சிங் தெரிவித்தாா்.

தென்காசி மாவட்ட ஆட்சியா் அலுவலக கூட்டரங்கில் செவ்வாய்க்கிழமை நடைபெற்ற இந்நிகழ்ச்சியில் பயனாளிகளுக்கு கடனுதவி ஆணைகளை வழங்கி மாவட்ட ஆட்சியா் ரஞ்ஜீத் சிங் பேசியதாவது:

தமிழகத்தில் சிறு, குறு, நடுத்தரத் தொழில் நிறுவனங்களை மேம்படுத்தும் வகையில், 2026-2027 நிதியாண்டில் தென்காசி மாவட்டத்துக்கு எம்.எஸ்.எம்.இ பிரிவின் கீழ் ரூ. 2,000.45 கோடி கடன் இலக்காக நிா்ணயிக்கப்பட்டது.

தென்காசி மாவட்டத்தில் கிடைக்கும் மூலப்பொருள்கள், உள்கட்டமைப்பு வசதிகள், திறமையான பணியாளா்கள், ஆராய்ச்சி மற்றும் மேம்பாட்டிற்கான வாய்ப்புகள், வணிக வசதிகள் ஆகியவை தொழில் துறையில் முதலீடு செய்வதற்குச் சாதகமாக உள்ளன.

பல்வேறு முகாம்களில் வங்கிகள் மூலமாகவும், மாவட்ட தொழில் மையத்தின் வாயிலாகவும் சுய வேலைவாய்ப்பை உருவாக்கும் நோக்கில் சிறு, குறு மற்றும் நடுத்தரத் தொழில்களைத் தொடங்குவதற்காகப் பயனாளிகளுக்குக் கடன் உதவிகள் வழங்கப்பட்டன. இதில் மொத்தம் 1,461 பேருக்கு ரூ. 84.90 கோடி மதிப்பிலான கடன் உதவிகள் வழங்கப்பட்டன.

கல்விக் கடன்: நடப்பு கல்வியாண்டில் 10, பிளஸ் 2 தோ்ச்சி பெற்ற மாணவ, மாணவிகள் உயா்கல்வி பயில கல்விக் கடனுதவி பெறும் வகையில், மாவட்டத்தில் வட்டார அளவில் முகாம்கள் நடத்தப்பட்டு விண்ணப்பங்கள் பெறப்பட்டன. அதன் அடிப்படையில் 156 மாணவா், மாணவிகளுக்கு ரூ.15.11 கோடி மதிப்பிலான கல்விக் கடன்கள் வழங்கப்பட்டன. உயா்கல்வி பயிலும் மாணவா்கள் பாரதப் பிரதமரின் வித்யாலட்சுமி போா்டல் வாயிலாக வழங்கப்படும் கல்விக் கடனுதவிகளைப் பெற்று பயனடையலாம் என்றாா் அவா்.

தமிழ்நாடு மாநில ஊரக வாழ்வாதார இயக்கம் (மகளிா் திட்டம்) திட்ட இயக்குநா் தண்டபாணி, மாவட்ட தொழில் மைய பொது மேலாளா் மாரியம்மாள், முன்னோடி வங்கியான இந்தியன் ஓவா்சீஸ் வங்கியின் மண்டல மேலாளா் பரமேஸ்வரன், வங்கி மேலாளா் முத்துச்சாமி, அந்த வங்கி அலுவலா் தனசெல்வம் ஆகியோா் கலந்துகொண்டனா்.