அடவிநயினாா் அணைப் பகுதியில் மனித-வனவிலங்கு மோதலைத் தடுக்க சிறப்பு பயிற்சி

செங்கோட்டை அருகேயுள்ள அடவிநயினாா் அணைப்பகுதியில் மனித-வனவிலங்கு மோதலைத் தடுக்க வனத்துறை சாா்பில் சிறப்பு ஒத்திகை மற்றும் பயிற்சி வெள்ளிக்கிழமை நடைபெற்றது.

தென்காசி மாவட்டம், கடையநல்லூா் வனச்சரகத்திற்கு உள்பட்ட மேற்குத் தொடா்ச்சி மலை வனப்பகுதியில் யானைகள், சிறுத்தைகள், கரடிகள், மான்கள், காட்டெருமைகள் உள்ளிட்ட ஏராளமான வன விலங்குகள் உள்ளன. இவை அவ்வப்போது விவசாய நிலங்களுக்குள் புகுந்து பயிா்களைச் சேதப்படுத்துவதுடன், மனித-வனவிலங்கு மோதல்களும் ஏற்பட்டு வருகின்றன.

வனவிலங்குகளின் நடமாட்டத்தைக் கண்காணிக்க அதிநவீன செயற்கை நுண்ணறிவு (ஏ.ஐ.) கேமராக்கள் அமைக்கப்பட்டுள்ளன. இவற்றின் மூலம் வனவிலங்குகளின் நடமாட்டத்தைக் கண்காணித்து, அவை குடியிருப்புகள் மற்றும் விவசாய நிலங்களுக்குள் நுழைவதைத் தடுக்க வனத்துறையினா் நடவடிக்கை எடுத்து வருகின்றனா்.

இந்நிலையில், வடகரை அடவிநயினாா் அணைப் பகுதியில் வனத்துறையினருக்கான சிறப்புப் பயிற்சி நடைபெற்றது. மாவட்ட வன அலுவலா் ராஜ்மோகன் தலைமையில், மாவட்ட உதவி வனப் பாதுகாவலா் நெல்லைநாயகம், கடையநல்லூா் வனச்சரகா் கனகராஜ் ஆகியோரின் மேற்பாா்வையில் பயிற்சி நடைபெற்றது.

சென்னையிலிருந்து வருகை தந்த உயா் குழுவினா், தென்காசி மாவட்டத்தின் பல்வேறு வனச்சரகங்களைச் சோ்ந்த வனவா்கள், வனக்காப்பாளா்கள், வேட்டைத் தடுப்புக் காவலா்கள் உள்ளிட்ட வனத்துறைப் பணியாளா்களுக்கு பயிற்சி அளித்தனா்.

இதில், ஆறுகளைக் கடத்தல், வனப்பகுதியில் தங்குதல், இரவு நேர ரோந்து, கயிறு ஏறுதல், துப்பாக்கி சுடுதல், வெடிபொருள்களைக் கையாளுதல், முதலுதவி அளித்தல், வனவிலங்குகள் மற்றும் மனிதா்களை மீட்பது, யானைகளின் நடமாட்டத்தை கண்காணித்தல் உள்ளிட்ட பல்வேறு பயிற்சிகள் அளிக்கப்பட்டன.

மேலும், வனவிலங்குகளால் பாதிக்கப்படும் விவசாயிகளைப் பாதுகாப்பாக மீட்டு அழைத்து வருவது குறித்தும், காட்டு யானைகளின் காது அசைவுகள், பாா்வை மற்றும் நடவடிக்கைகளை கவனித்து அவற்றின் நடமாட்டத்தை அறிந்து பாதுகாப்பான முறையில் எதிா்கொள்வது குறித்தும் ஒத்திகை பயிற்சி நடைபெற்றது.

இந்தப் பயிற்சியில் வனவா்கள் மகேந்திர பாண்டியன், அஸ்வின், மகேந்திரன், மணிகண்டன், காா்த்திக் ராஜா, சங்கா் ராஜா, பாரதி உள்ளிட்ட வனத்துறையினா் கலந்து கொண்டனா்.