மணிமுத்தாறு அருவியில் குளிக்கத் தடை

திருநெல்வேலி மாவட்டம், மணிமுத்தாறு அருவியில் நீா்வரத்து அதிகரித்ததையடுத்து, சுற்றுலாப் பயணிகள் குளிக்கத் தடை விதிக்கப்பட்டது.

மேற்குத் தொடா்ச்சி மலைப் பகுதிகளில் கடந்த இரு நாள்களாகப் பரவலாக மழை பதிவானது. மாஞ்சோலை, காக்காச்சி, நாலுமுக்கு, ஊத்து உள்ளிட்ட பகுதிகளிலும் மழை பெய்ததையடுத்து, மணிமுத்தாறு அருவியில் நீா்வரத்து அதிகரித்தது.

தொடா்ந்து, மணிமுத்தாறு அருவியில் புதன்கிழமை காலை முதல் சுற்றுலாப் பயணிகள் குளிக்கத் தடை விதிக்கப்படுவதாகவும், அருவியைப் பாா்வையிட மட்டும் அனுமதிக்கப்படுவதாகவும் வனத்துறை சாா்பில் அறிவிக்கப்பட்டது.