சாத்தான்குளம் அருகே தகராறில் வெட்டுக் காயமடைந்த பெண் சாவு

சாத்தான்குளம் அருகே சொத்து தகராறில் வெட்டுக் காயமடைந்த பெண் சனிக்கிழமை மருத்துவமனையில் இறந்தார்.

செட்டிவிளையைச் சேர்ந்தவர் பிரான்சிஸ்தா மேரி (65). இவருக்கு 4 மகள்களும், இரு மகன்களும் உள்ளனர். இவரை அவரது மகள் ஜான்சிராணி (45) கவனித்து வந்தாராம். இந்நிலையில் ஒரு மாதத்துக்கு முன் சென்னையில் இருந்து வந்த அவரது மகன் தங்கதுரை (35) சொந்த ஊரிலேயே விறகு வெட்டும் தொழில் செய்து வந்தாராம்.

இந்நிலையில் அவர் பிரான்சிஸ்தாமேரியிடம் உள்ள 6 சென்ட் நிலத்தை பிரித்து தருமாறு கேட்டு வந்தாராம். இந்நிலையில் இம்மாதம் 21ஆம் தேதி இதுதொடர்பாக தங்கதுரைக்கும்,  பிரான்சிஸ்தாமேரிக்கும் பிரச்னை ஏற்பட்டது. அப்போது  தங்கதுரை, அவரை அரிவாளால் வெட்டிக் கொலை செய்தார்.

இதை தடுக்க முயன்ற ஜான்சிராணியையும், அவரது மகள் ஆரோக்கியஜெனிபரையும் (16) தங்கதுரை அரிவாளால் வெட்டினாராம். இதில் பலத்த காயமடைந்த இருவரும் திருநெல்வேலியில் உள்ள தனியார் மருத்துவமனையில் சேர்க்கப்பட்டனர். இந்நிலையில் ஜான்சிராணி சனிக்கிழமை சிகிச்சை பலனின்றி இறந்தார்.

இதற்கிடையே ஜான்சிராணி இறந்ததால் ஏற்கெனவே கைது செய்யப்பட்டு சிறையிலிருக்கும் தங்கதுரை மீது இரட்டைக் கொலை வழக்கு பதிவு செய்யப்பட்டுள்ளது.