மஞ்சள் பயிரில் இலைத் தீயல் நோயை கட்டுப்படுத்த விவசாயிகளுக்கு ஆலோசனை

பெரம்பலூர் மாவட்டத்தில் நிகழாண்டில் சுமார் 1,630 ஏக்கர் பரப்பில் பயிரிடப்பட்டுள்ள மஞ்சள் பயிரை டேப்ரினா மேக்குலன்ஸ் எனும் பூஞ்சை தாக்கி இலைத் தீயல் நோய் ஏற்படுத்துகிறது.

மேலும், காற்றின் மூலம் பரவும் தன்மை கொண்ட இந்நோயை உடனடியாகக் கட்டுப்படுத்த வழிமுறைகள்:

இந்நோயால் தாக்கப்பட்ட இலைகளைப் பறித்து தீயிட்டு கொளுத்திவிட்டு, "அசாஸிஸ்ட்ரோபின்' மற்றும் "டைபென்கோனசோல்' எனும் இரு மருந்துகளின் சேர்க்கை கொண்ட பூஞ்சாணக் கொல்லியை 1 லி நீருக்கு 1 மி என்ற அளவில் கலந்து 10 நாள் இடைவெளியில் நோயின் தீவிரத்தைப் பொறுத்து 2 (அ) 3 முறை தெளிக்க வேண்டும்.

மேலும், மஞ்சள் இலைகள் வெளிர் நிறத்தில் காணப்பட்டால், மருந்து தெளிக்கும் போதே நீரில் கரையக்கூடிய 19-19-19 உரத்தை 1 லி நீருக்கு 5 கி என்ற அளவில் கலந்து தெளிக்கலாம் என வாலிகண்டபுரத்தில் உள்ள வேளாண் அறிவியல் மையத் தலைவர் (பொ) ஜெ. கதிரவன் சனிக்கிழமை வெளியிட்டுள்ள செய்திக்குறிப்பில் தெரிவிக்கப்பட்டுள்ளது.