பட்டுக்கோட்டை- தஞ்சை சாலையில் வேகத்தடைகளை அகற்றக் கோரி மனு

பட்டுக்கோட்டை- தஞ்சாவூர் சாலையில் விதிமுறைக்கு புறம்பாக உள்ள வேகத்தடைகளை அகற்ற வேண்டும் என்று கோரிக்கை விடுக்கப்பட்டுள்ளது.

இதுகுறித்து பட்டுக்கோட்டை அருகேயுள்ள பொன்னவராயன்கோட்டைப் பகுதியைச் சேர்ந்த வீரசேனன் மாவட்ட வருவாய் அலுவலர் பெ. சந்திரசேகரனிடம் திங்கள்கிழமை அளித்த மனு:

பட்டுக்கோட்டை நகரப் பேருந்து நிலையத்துக்கும், தஞ்சாவூர் புதிய பேருந்து நிலையத்துக்கும் இடையே சுமார் 57 கி.மீ., தூரம் உள்ளது. இந்த சாலையில் மொத்தம் 52 வேகத்தடைகள் உள்ளன.

அரசு விதிகளின்படி 12 மீட்டர் நீளமும், 3.5 மீட்டர் அகலமும் கொண்ட அளவில் தான் வேகத்தடைகள் அமைக்க வேண்டும். ஆனால் விதிகளுக்கு புறம்பாக வேகத்தடைகள் தேவையற்ற இடங்களில் அமைக்கப்பட்டுள்ளது.

மேலும் வேகத்தடைகள் உள்ள இடங்களில் எந்தவித அறிவிப்பு பலகைகளும் இல்லை. இதனால் அடிக்கடி விபத்துகள் நிகழ்கின்றன. எனவே அரசு விதிகளுக்கு புறம்பாக அமைக்கப்பட்டுள்ள வேகத்தடைகளை அகற்ற மாவட்ட ஆட்சியர் நடவடிக்கை எடுக்க வேண்டும்.