விநாயகர் சதுர்த்தி ஊர்வலம்: டாஸ்மாக் கடைகளுக்கு விடுமுறை அளிக்கக் கோரிக்கை

தஞ்சாவூரில் விநாயகர் சதுர்த்தி விழா ஊர்வலம் நடைபெறும் நாளன்று டாஸ்மாக் கடைகளுக்கு விடுமுறை அளிக்க வேண்டும் என்று இந்து இளைஞர் எழுச்சிப் பேரவை கோரிக்கை விடுத்துள்ளது.

தஞ்சாவூர் மாவட்ட ஆட்சியர் அலுவலகத்தில் பொதுமக்கள் குறைதீர்க்கும் நாள் கூட்டம் மாவட்ட வருவாய் அலுவலர் பெ. சந்திரசேகரன் தலைமையில் திங்கள்கிழமை நடைபெற்றது. இதில் இந்து இளைஞர் எழுச்சிப் பேரவை அமைப்பாளர் பி. ஜெகன்நாத் சிங் அளித்த மனு:

விநாயகர் சதுர்த்தி விழாவின் போது விசர்ஜன ஊர்வலம் நடைபெறும் நாளான்று டாஸ்மாக் கடைகளுக்கு விடுமுறை அளிக்க வேண்டும்.

தஞ்சாவூரில் பல இடங்களில் முன்பு விநாயகர் சிலை வைக்கப்பட்டு வழிபாடு நடத்தப்பட்டது. கடந்த 2 ஆண்டுகளாக அந்த இடங்களில் பல்வேறு காரணங்களால் சிலை வைக்கப்படவில்லை. தற்போதும் அந்த இடத்தில் சிலைகள் வைக்க அனுமதி மறுக்கப்படுகிறது. ஆகையால் புதிய இடங்களில் விநாயகர் சிலைகள் வைக்க அனுமதி கொடுக்காவிட்டாலும், ஏற்கனவே சிலை வைத்த இடங்களில் மட்டும் மீண்டும் சிலை வைக்க அனுமதி வழங்க வேண்டும்.