திருக்குறள் போட்டியில் வென்றோருக்குப் பரிசளிப்பு

திருச்சியில் ஸ்ரீராம் இலக்கியக் கழகத்தால் நடத்தப்பட்ட திருக்குறள் பேச்சு, ஓவியப் போட்டியில் வெற்றி பெற்றோருக்கு ஞாயிற்றுக்கிழமை பரிசுகள் வழங்கப்பட்டன.
திருச்சி சிந்தாமணி இ.ஆர். மேல்நிலைப் பள்ளியில் நடைபெற்ற இப்போட்டிகளில், 6 முதல் 8 ஆம் வகுப்பு வரை பயிலும் இடைநிலைப் பிரிவு, 9 ஆம் வகுப்பு முதல் பிளஸ் 2 வரை பயிலும் மேல்நிலை மற்றும் இளநிலை, முதுநிலை பட்டப் படிப்பு, பொறியியல், மருத்துவம், பாலிடெக்னிக்  பயிலும் கல்லூரிப் பிரிவு என 3 பிரிவுகளில் சுமார் 500 மாணவ, மாணவிகள் பங்கேற்று தங்கள் திறமைகளை வெளிப்படுத்தினர்.
தொடர்ந்து, நடைபெற்ற பரிசளிப்பு விழாவுக்கு இ.ஆர்.மேல்நிலைப் பள்ளித் தலைமையாசிரியர் சி.ஆர்.மனோகர் தலைமை வகித்தார். ஸ்ரீராம் சிட்ஸ் திருச்சி முதுநிலை மேலாளர் எஸ். மருதுபாண்டி முன்னிலை வகித்தார். போட்டிகளில் வெற்றி பெற்றவர்களுக்கு  இ.ஆர். மேல்நிலைப் பள்ளித் தலைவர் ஆர்.ராகவன் பரிசுகளை வழங்கினார்.
ஸ்ரீராம் சிட்ஸ் மண்டல மேலாளர் விசுவநாதன், பள்ளி உதவித் தலைமையாசிரியர் எம்.என். கிருஷ்ணமூர்த்தி உள்ளிட்டோர் பங்கேற்றனர்.  ஸ்ரீராம் சிட்ஸ் முதுநிலை மேலாளர் க.திருமுருகன் நன்றி கூறினார்.