தொழில்நுட்பக் கோளாறால் விமானம் நிறுத்திவைப்பு

துபையிலிருந்து வந்த ஏர் இந்தியா எக்ஸ்பிரஸ் விமானம் தொழில் நுட்பக் கோளாறு காரணமாக திருச்சியில் நிறுத்தப்பட்டது.
துபையிலிருந்து இந்த விமானம் ஒரு மணி நேரம் தாமதமாக ஞாயிற்றுக்கிழமை திருச்சி வந்து சேருமென அறிவிக்கப்பட்டதால், பாதுகாப்பு சோதனைகள் முடித்த 141 பயணிகள் விமான நிலையத்தில் காத்திருந்தனர். அதிகாலை 4 மணியளவில் திருச்சி வந்த விமானத்தில் தொழில் நுட்பக் கோளாறு ஏற்பட்டது. 
இதையடுத்து, பயணிகளில் சிலர் பயண தேதியை மாற்றியும், சிலர் ரத்து செய்து சென்றனர். 83 பேர் மட்டும் விடுதியில் காக்க வைக்கப்பட்டனர். மாற்று ஏற்பாடாக திருவனந்தபுரத்திலிருந்து பிற்பகல் 1.30 மணிக்கு வந்த வேறு விமானத்தில் அவர்கள் அனுப்பி வைக்கப்பட்டனர். பழுதான விமானம் இரவு பழுது நீக்கம் செய்து அனுப்பி வைக்கப்படும் என அதிகாரிகள் தெரிவித்தனர்.