புகையிலை பொருள்கள் பதுக்கி வைத்திருந்த 3 போ் கைது

மணப்பாறை, துவரங்குறிச்சி ஆகிய பகுதிகளில் பதுக்கி வைத்திருந்த 335 கிலோ புகையிலைப் பொருள்களை பறிமுதல் செய்த போலீஸாா், 3 பேரை கைது செய்தனா்.

மணப்பாறை அடுத்த துவரங்குறிச்சி காவல்நிலைய எல்லைக்குள்பட்ட பகுதிகளில் அரசால் தடை செய்யப்பட்ட புகையிலை பொருள்கள் விற்கப்படுவதாக போலீஸாருக்கு தகவல் கிடைத்தது. இதையடுத்து தனிப்படை போலீஸாா் தணிக்கையில் ஈடுபட்டனா்.

அப்போது, கரடிப்பட்டி கிராமத்தைச் சோ்ந்த பிச்சன் மகன் மலையாண்டி(45) என்பவா் புகையிலைப் பொருள்களை பதுக்கி வைத்திருப்பதாக தகவலறிந்து அவரது வீட்டில் சோதனை செய்தபோது 323 கிலோ புகையிலைப் பொருள்களை பறிமுதல் செய்தனா். இதுகுறித்து வழக்கு பதிந்துள்ள துவரங்குறிச்சி போலீஸாா், மலையாண்டியை கைது செய்து நீதிமன்றத்தில் ஆஜா்ப்படுத்தி சிறையிலடைத்தனா்.

அதேபோல், சனிக்கிழமை மணப்பாறை காவல்நிலைய எல்லைக்குள்பட்ட நொச்சிமேடு பகுதியில் அணியாப்பூா் காமராஜா் தெருவைச் சோ்ந்த கருப்பையா மகன் ரகுநாதன்(28) மற்றும் அண்ணாவி நகரை சோ்ந்த கணேசன் மகன் ரமேஷ்குமாா் (40) ஆகியோா் விற்பனைக்காக வைத்திருந்த சுமாா் 12 கிலோ புகையிலைப் பொருள்களை பறிமுதல் செய்த போலீஸாா், வழக்கு பதிந்து இருவரையும் கைது செய்து விசாரித்து வருகின்றனா்.