வாகன விபத்தில் ஓய்வு பெற்ற ஆசிரியா் உயிரிழப்பு
மணப்பாறை அருகே திங்கள்கிழமை பயணிகள் ஆட்டோ மற்றும் காா் மோதிய விபத்தில் இருசக்கர வாகனத்தில் சென்ற ஓய்வு பெற்ற அரசுப் பள்ளி ஆசிரியா் உயிரிழந்தாா்.
மணப்பாறையை அடுத்த மலையடிப்பட்டி வடக்குத் தெருவைச் சோ்ந்தவா் அருளப்பன் மகன் தாமஸ் ஆரோக்கியம் (62). இவா் மணப்பாறை நகராட்சி நடுநிலைப் பள்ளியில் ஆசிரியராக பணியாற்றி ஓய்வு பெற்றாா். இந்நிலையில், திங்கள்கிழமை பிற்பகலில் மணப்பாறைக்கு வந்தவா் மீண்டும் தனது இருசக்கர வாகனத்தில் வீடு திரும்பியுள்ளாா்.
இருசக்கர வாகனம் திருச்சி - திண்டுக்கல் தேசிய நெடுஞ்சாலையில் மஞ்சம்பட்டி அருகே சென்று கொண்டிருந்தபோது, அதே திசையில் பயணிகள் ஆட்டோ ஒன்றும் பின்னால் சென்றுள்ளது. அதனைத்தொடா்ந்து பின்னால் சென்ற காா் ஒன்று, முன்னால் சென்ற பயணிகள் ஆட்டோ மீது மோதியும், ஆட்டோ இருசக்கர வாகனம் மீது மோதியும் விபத்துக்குள்ளானது.
Advertisement
Advertisement
இதில், தாமஸ் ஆரோக்கியம் தலையில் பலத்த காயமடைந்து நிகழ்விடத்திலேயே உயிரிழந்தாா். ஆட்டோ ஓட்டுநா் காயமடைந்து மருத்துவமனையில் சிகிச்சை பெற்றாா்.
தகவலறிந்து நிகழ்விடத்துக்கு சென்ற மணப்பாறை போலீஸாா், தாமஸ் ஆரோக்கியம் உடலை கைப்பற்றி உடற்கூறாய்வுக்காக மணப்பாறை அரசு மருத்துவமனைக்கு அனுப்பி வைத்து, வழக்குப் பதிந்து விசாரிக்கின்றனா்.