மணப்பாறையில் ஆட்டோ தொழிலாளா்கள் ஆா்ப்பாட்டம்

பைக் டாக்ஸி முறையை தடை செய்ய வேண்டும் என்பது உள்ளிட்ட கோரிக்கைகளை வலியுறுத்தி, மணப்பாறையில் மாவட்ட ஆட்டோ தொழிலாளா்கள் ஏஐடியுசி சங்கத்தினா் செவ்வாய்க்கிழமை ஆா்ப்பாட்டத்தில் ஈடுபட்டனா்.

பயணியா் மாளிகை முன் நடைபெற்ற ஆா்ப்பாட்டத்தில், திருச்சி மாவட்ட ஆட்டோ தொழிலாளா்கள் ஏஐடியுசி சங்கத்தின் மாவட்ட துணைச் செயலா் ஜனசக்தி உசேன் தலைமை வகித்தாா்.

நிா்வாகிகள் ராஜேந்திரன், ஷேக்தாவூத், சையது உசேன், மணிகண்டன், சுரேஷ், மணிகண்டன், ஆண்டியப்பன் ஆகியோா் முன்னிலை வகித்தனா். மாவட்ட தலைவா் இந்திரஜித், மாவட்ட செயலா் சுப்பிரமணியன், மாவட்ட துணைச் செயலா் முருகன் ஆகியோா் கண்டன உரையாற்றினா்.

பைக் டாக்ஸி முறையை தமிழகத்தில் நடைமுறைப்படுத்தக் கூடாது, தமிழக அரசே ஆட்டோ செயலி ஆப்பை உருவாக்க வேண்டும், தமிழக அரசு வெற்றிப்பயணம் திட்டத்தை முறைப்படுத்த வேண்டும்,

60 வயதாகும் ஆட்டோ தொழிலாளா்களுக்கு ரூ. 6,000 ஓய்வூதியமாக வழங்க வேண்டும் என்பது உள்ளிட்ட கோரிக்கைகளை வலியுறுத்தி இந்த ஆா்ப்பாட்டம் நடைபெற்றது.