பேரவையில் மக்கள் பிரச்னைகளை பேச வாய்ப்புத் தரவில்லை: நேரு எம்.எல்.ஏ.

பேரவையில் மக்கள் பிரச்னைகளைப் பேசக் கூட வாய்ப்பு தர மறுக்கின்றனர் என ஜி.நேரு எம்.எல்.ஏ. குற்றம் சாட்டியுள்ளார்.

பேரவைக் கூட்டம் முடிந்தபின்னர் அவர் செய்தியாளர்களிடம் கூறியதாவது:

புதுச்சேரியில் பல்வேறு பிரச்னைகள் உள்ளன. பொதுப்பணித் துறை, மின் துறை, உள்ளாட்சித் துறை, குடிமைப் பொருள் வழங்கல் துறை, ஆதிதிராவிடர் நலத் துறை என பல்வேறு அரசுத் துறைகளின் செயல்பாடுகள் மிக மோசமாக உள்ளன.

தரமற்ற பொருள்களை வாங்கி சாலைகளையும், கட்டடங்களைடும் கட்டுகின்றனர்.

ஆளும் அரசின் செயல்பாடு மிக மோசமாக உள்ளது.

பேரவையில் மக்கள் பிரச்னைகளை எழுப்புவதற்காக 10 நாள்கள் கூட்டத்தை கூட்டும்படி பேரவைத் தலைவரிடம் கடிதம் அளித்தேன். ஆனால் அதன் மீது எந்த நடவடிக்கையும் எடுக்கவில்லை. முறையான பதிலும் தெரிவிக்கவில்லை.

பட்டா, மனைப்பட்டா, ரேஷன் அட்டை, ஸ்மார்ட் கார்டு, வருவாய்த் துறை சான்றிதழ்கள் கோரி மக்கள் திண்டாடி வருகின்றனர்.

காவல் துறையோ மெத்தனமாக உள்ளது. கொலை, கொள்ளை, வழிப்பறி சம்பவங்கள் அதிகரித்து வருகின்றன என்றார் நேரு.