விஸ்வாசம் படத்துக்குத் தமிழ்நாட்டில் கிடைத்த வசூல்: தயாரிப்பாளர் அளித்த அதிகாரபூர்வத் தகவல்!

அஜித் - இயக்குநர் சிவா ஆகிய இருவரும் மீண்டும் இணைந்த படம் - விஸ்வாசம். கதாநாயகியாக நயன்தாரா நடித்தார். சத்யஜோதி ஃபிலிம்ஸ் தயாரித்த இப்படத்தில் ஜகபதி பாபு, விவேக், யோகி பாபு, ரோபோ சங்கர், தம்பி ராமையா, கோவை சரளா போன்றோரும் நடித்தார்கள். இசை - இமான், ஒளிப்பதிவு - வெற்றி. இந்தப் படம்  ஜனவரி 10-ம் தேதி வெளியானது. 

இந்நிலையில் அஜித்தின் விஸ்வாசம் தமிழ்நாட்டில் ரூ. 130 கோடி வரை வசூலித்துள்ளதாக அப்படத்தின் தயாரிப்பாளர் சத்யஜோதி தியாகராஜன் கூறியுள்ளார். ஆங்கில நாளிதழ் ஒன்றுக்கு அவர் அளித்த பேட்டியில் விஸ்வாசம் படத்தின் வசூல் நிலவரம் குறித்துக் கூறியதாவது:

படம் அசுர வெற்றியடைந்துள்ளது. தமிழ்நாட்டில் மட்டும் கிட்டத்தட்ட ரூ. 125 கோடி முதல் ரூ. 130 கோடி வரை வசூலித்துள்ளது. இதில் விநியோகஸ்தர்களின் வாழ்நாள் பங்கு எப்படியும் ரூ. 70 கோடி முதல் ரூ. 75 கோடி வரை இருக்கும்.  எந்த ஒரு அளவுகோலிலும் இது மகத்தான சாதனை. படத்தின் உள்ளடக்கம் குடும்ப ரசிகர்களை ஈர்த்தது. தக்க சமயத்தில் படம் வெளியானது. கிட்டத்தட்ட 600 திரையரங்கில் வெளியானதால் எங்களுக்குச் சாதகமாக அமைந்தது. வெளியீட்டின்போது கடும்போட்டி அமைந்தாலும் விஸ்வாசம் படத்துக்குத் தொடக்க வசூல் அபாரமாக அமைந்தது என்று கூறியுள்ளார்.

விஸ்வாசம் படம் அமேஸான் பிரைமில் வரும் திங்களன்று (பிப்ரவரி 25) வெளியாகவுள்ளது. படம் வெளிவந்த 46-வது நாளன்று இணையத்தில் வெளியாவதால் திரையரங்கில் படம் பார்க்காதவர்களுக்குத் தற்போது படம் பார்க்க ஒரு சந்தர்ப்பம் கிடைத்துள்ளது.