மேகாலயத்தின் நீண்டகால எம்எல்ஏ மறைவு

மேகாலய மாநிலத்தில் செயல்படும் மலை மாநில மக்கள் ஜனநாயகக் கட்சித் தலைவரும், எம்எல்ஏவுமான ஹோப்பிங் ஸ்டோன் லிங்க்தோ (86) சனிக்கிழமை காலமானார்.

கடந்த 1972-ஆம் ஆண்டு உதயமான மேகாலய மாநிலத்தில் இதுவரை தோல்வியே கண்டிராத மூத்த எம்எல்ஏ ஹோப்பிங் ஆவார். யுரேனிய சுரங்கங்களுக்கு எதிராக தனியொரு நபராய் மிகப் பெரிய அளவிலான பிரசாரங்களை மேற்கொண்டதால் மக்கள் செல்வாக்குமிக்க தலைவராக உயர்ந்தவர் அவர்.

ஹோப்பிங்கிற்கு கடந்த ஞாயிற்றுக்கிழமை திடீர் நெஞ்சுவலி ஏற்பட்டதால் மருத்துவமனையில் அனுமதிக்கப்பட்டார். அத்துடன், நிமோனியா காய்ச்சல், வயோதிகம் சார்ந்த பிரச்னைகளாளும் அவர் பாதிக்கப்பட்டிருந்தார்.

இந்நிலையில், சனிக்கிழமை காலையில் ஹோப்பிங்கின் உயிர் பிரிந்தது. அவரது மறைவுக்கு மேகாலய முதல்வர் முகுல் சங்மா, சட்டப்பேரவைத் தலைவர் டி.மொண்டல், எதிர்க்கட்சித் தலைவர் தோங்கூபர் ராய் உள்ளிட்டோர் இரங்கல் தெரிவித்துள்ளனர்.