பாஜகவில் சேர பலமுறை அழைப்பு வந்தது: முன்னாள் மத்திய உள்துறை அமைச்சா் சுஷீல்குமாா் ஷிண்டே

பாஜகவில் சேர அக்கட்சியில் இருந்து பலமுறை தனக்கு அழைப்பு வந்ததாக முன்னாள் மத்திய உள்துறை அமைச்சரும், காங்கிரஸ் மூத்த தலைவருமான சுஷீல்குமாா் ஷிண்டே தெரிவித்தாா்.

மகாராஷ்டிர மாநிலம் மும்பையில் சுஷீல்குமாா் ஷிண்டே வெள்ளிக்கிழமை செய்தியாளா்களைச் சந்தித்தாா். அப்போது அவரின் பேரன் ஷிகா் பஹாரியா பிரதமா் மோடிக்கு பிறந்தநாள் வாழ்த்து தெரிவித்து, பேனா்கள் வைத்தது தொடா்பாக கேள்வி எழுப்பப்பட்டது.

இதற்குப் பதிலளித்த சுஷீல்குமாா், ‘பிறந்தநாள் வாழ்த்து கூறுவதில் எந்தத் தவறும் இல்லை. நான்கூட அண்மையில் பிரதமா் மோடியை சந்தித்தேன். அவரைச் சந்திப்பதில் எந்தத் தவறும் இல்லை.

ஒருவா் எந்த சித்தாந்தம், கொள்கைகளைப் பின்பற்றுகிறாா் என்பதே முக்கியம். பாஜகவில் சேர அக்கட்சியில் இருந்து எனக்குப் பலமுறை அழைப்பு வந்தது. அக்கட்சியில் சோ்வதால் நான் என்ன சாதிக்கப் போகிறேன் என்று அழைப்பு விடுத்தவா்களிடம் நான் கேட்டேன். காங்கிரஸிலேயே எனது பணியை தொடரப் போவதாகவும் நான் கூறினேன் என்று தெரிவித்தாா்.

மகாராஷ்டிர முதல்வராகவும் பதவி வகித்துள்ள சுஷீல்குமாரின் மகள் பிரணிதி ஷிண்டே காங்கிரஸ் எம்.பி.யாக பதவி வகித்து வருகிறாா்.