புதுச்சேரி முன்னேற விரும்பினால் முதல்வர் என்னை பற்றி விமர்சிக்கக்கூடாது: கிரண்பேடி

புதுச்சேரி: புதுச்சேரி முன்னேற விரும்பினால் முதல்வர் என்னை பற்றி விமர்சிக்கக்கூடாது என்று துணைநிலை ஆளுநர் கிரண்பேடி தெரிவித்துள்ளார். 

புதுவையில் துணை நிலை ஆளுநர் கிரண் பேடி வாரந்தோறும் சனி, ஞாயிற்றுக்கிழமைகளில் கள ஆய்வுப்பணி மேற்கொண்டு வருகிறார். சனிக்கிழமை அவருக்கு உடல் நிலையில் சிறிது பாதிப்பு ஏற்பட்டதால் கள ஆய்வு மேற்கொள்ளவில்லை. அதேநேரத்தில், தற்போது 175 கள ஆய்வுப்பணிகளை முடித்துள்ள ஆளுநர் கிரண் பேடி அது குறித்து ஆவணம் ஒன்றையும் தயார் செய்து வருகிறார்.

கள ஆய்வுப்பணியின்போது பிறப்பித்த உத்தரவுகளுக்கு இணங்க நடவடிக்கை எடுக்காத அதிகாரிகளிடம் விளக்கம் கேட்கப்படும். அதனடிப்படையில் மேல் நடவடிக்கையும் எடுக்கப்படும். பொதுமக்களுக்கு சேவை செய்வதும், அவர்களின் குறைகளை தீர்ப்பதும்தான் கள ஆய்வுப்பணியின் குறிக்கோள். அதை நாம் செயல்படுத்த வேண்டும். ஒவ்வொரு களப்பணியின் நேரமும் விலை உயர்ந்தது, மனித ஆற்றல் மற்றும் கூட்டு முயற்சியில் செய்யக்கூடியது எனத் தெரிவித்திருந்தார். 

இந்நிலையில்,  புதுச்சேரி சட்டப்பேரவை வளாகத்தில் நேற்று ஞாயிற்றுக்கிழமை முதல்வர் நாராயணசாமி செய்தியாளர்களிடம் கூறுகையில், உத்தரவு பிறப்பிக்க அதிகாரமில்லாத துணை நிலை ஆளுநர் கிரண் பேடி, தனது உத்தரவுகளை நிறைவேற்றாத அதிகாரிகள் மீது கடும் நடவடிக்கை எடுப்பேன் என்று கருத்து தெரிவித்துள்ளார். 

உச்ச நீதிமன்றத் தீர்ப்புக்குப் பின்னரும் அவர் விதிகளை மீறிச் செயல்பட்டு வருகிறார். அவரது உத்தரவுகளைக் கடைப்பிடிக்க வேண்டிய அவசியம் அதிகாரிகளுக்கு இல்லை. அமைச்சர்கள், அரசுச் செயலர்களுடன் கலந்தாலோசித்துதான் அவர் செயல்பட வேண்டும். 

ஆளுநர் கிரண் பேடி அதிகாரிகளை மிரட்டும் வகையில் செயல்படுகிறார். உச்ச நீதிமன்றத் தீர்ப்பை அவர் முழுமையாகப் படித்துப் பார்க்க வேண்டும் என்று தெரிவித்தார். 

இந்நிலையில், புதுச்சேரி முன்னேற விரும்பினால் முதல்வர் என்னை பற்றி விமர்சிக்கக்கூடாது என்றும் ஆளுநர் மாளிகையின் அதிகாரங்களை குறைத்து மதிப்பீடு செய்வதால் மாநில வளர்ச்சி வேகம் குறையும் என புதுச்சேரி துணைநிலை ஆளுநர் கிரண்பேடி தெரிவித்துள்ளார்.