மழை மலை மாதா தேவாலயப் பெருவிழா: அக். 1-இல் தொடக்கம்

அச்சிறுப்பாக்கம் மழை மலை மாதா தேவாலய ஆண்டுப் பெரு விழா வருகிற அக்டோபர் 1-ஆம் தேதி தொடங்கி 4-ஆம் தேதி வரை நான்கு நாள்கள் நடைபெறுகிறது.

மதுராந்தகத்தை அடுத்த அச்சிறுப்பாக்கம் மலை மீது அமைந்துள்ள பிரசித்தி பெற்ற மழை மலை மாதா தேவாலயத்தின் 47-ஆவது ஆண்டுப் பெரு விழா வருகிற அக்டோபர் மாதம் 1-ஆம் தேதி (வியாழக்கிழமை) மாலை 5.30 மணிக்கு திருக்கொடி மந்திரிப்பு, திருக்கொடியேற்றம் நடைபெறுகிறது. இந்நிகழ்ச்சிக்கு மழை மலை மாதா மறை மாவட்ட முதன்மை குரு மரிய ஜோசப் முன்னிலை வகிக்கிறார். வேலூர் கத்தோலிக்க மறை மாவட்ட ஆயர் சௌந்தர ராஜு தலைமை வகிக்கிறார்.

மறுநாள் வெள்ளிக்கிழமை (2.10.2015) காலையில் திருவூடல் திருவிழா, திருப்பலி நடைபெறுகிறது. இதில் மறை மாவட்ட இளங்குரு மடம் என்.ஆர்.சார்லஸ், மயிலை முன்னாள் பேராயர் ஏ.எம்.சின்னப்பா, மறைமாவட்ட உதவி அதிபர் ஜோசப், ரெட்டிப்பாளையம் ஜார்ஜ், ஆனந்த பாக்கியராஜ், சகாயராஜ், செல்வராஜ், ஓரகடம் பங்குத் தந்தை வின்சென்ட் ராஜ் உள்பட பலர் கலந்து கொள்கின்றனர்.

மூன்றாம் நாளான சனிக்கிழமை படப்பை பங்குத் தந்தை பி.அம்புரோஸ், அருள்தல உதவி அதிபர்கள் ஜேக்கப், ராஜீ ஆகியோர் தலைமையில் சிறப்பு திருப்பலி நடைபெறுகிறது. மாலை 6.30 மணிக்கு செங்கை மறை மாவட்ட ஆயர் ஏ.நீதிநாதன் தலைமையில், 5 திருத் தேர்களின் ஆடம்பரப் பவனி நடைபெறுகிறது.

4-ஆம் நாளான ஞாயிற்றுக்கிழமை (4.10.15) காலை 5.30 மணிக்கு மழை மலை மாதா திருக்காட்சி மலையில் திருப்பலி நடைபெறுகிறது. காலை 6.30 மணிக்கு மழை மலை மாதா திருத்தேர் பவனியும், ஏழைகளுக்கு இலவசத் திருமணங்கள், திருவருள் சாதனங்கள் வழங்கல் நடைபெறுகிறது.

மாலை 6 மணிக்கு திருக்கொடி இறக்கம் நடைபெறுகிறது. செங்கல்பட்டு வழக்குரைஞர் எல்.யேசு மரியான் தலைமையில், திருவிழா நிறைவுத் திருப்பலி பூஜை நடைபெறுகிறது. திருவிழாவையொட்டி கலை நிகழ்ச்சிகள், அன்னதானம் போன்றவை நடைபெறுகின்றன.

இதற்கான ஏற்பாடுகளை அச்சிறுப்பாக்கம் மழை மலை மாதா மறை மாவட்ட முதன்மை குரு மரிய ஜோசப் தலைமையில், எல்.தாஸ், ஜேக்கப், ராஜீ, அருள்சகோதரர் செபாஸ்டியன் உள்ளிட்டோர் செய்து வருகின்றனர்.